30-31 қазан күндері ÁMEN анимациялық фильмдер кинофестивалі онлайн форматта өтеді, деп хабарлайды "ҚазАқпарат" тілшісі

Биыл екінші мәрте ұйымдастырылып жатқан бұл кинофестивал онлайн форматта өтетін болып онда, «Бұл байқаудың ерекшелігі – өнер додасының халықаралық деңгейге көтерілуі, шараға түркі елдерінің, атап айтқанда, Түркия, Әзербайжан, Түркіменстан, Өзбекстан, Қырғызстан, Татарстан және Башқұртстан өкілдері де қатысады. Бұл жолы фестивальге 40-тан аса жұмыс ұсынылды», - дейді ұйымдастырушылар.

Өткен жылы атаулы фестиваль қоржынына 80-нен астам өтінім түсіп, байқауға 51 жұмыс іріктеп алынған еді. Нәтижесінде 7 жеңімпаз анықталып, 5 жоба арнайы жүлдемен марапатталған.

Ай соңына белгіленген байқауға 2019-2020 жылдары түсірілген анимациялық фильмдер, студенттік анимациялық жұмыстар және комикстер сынға түседі. Оған өтінім білдірген барлық суретші-мультипликаторлар қатыса алады.

Шара аясында «Рухани жаңғыру» қазақстандық қоғамдық даму институтының қатысуымен «Қазақ анимациясының көкейкесті мәселелері» және «Түркітілдес елдердің анимациялық киноөнерінің бүгіні мен ертеңі» тақырыбында дөңгелек үстелдер және «Қазақстан: табиғат және адам» атты комикстер көрмесі ұйымдастырылады. Сондай-ақ, Ұлттық киноны қолдау мемлекеттік орталығының атсалысуымен отандық және шетелдік озық мультипликаторлардың мастер-кластары мен тренингтер өтізу жоспраланған.

Бұдан бөлек, «Қазақфильм» киностудиясының қолдауымен қазақ анимациялық фильмдері ретроспективасы, яғни 1960-2020 жылдар аралығында жарық көрген «Қарлығаштың құйрығы неге айыр?», «Қаңбақ шал», «Жошы хан», «Толағай», «Мұзбалақ» сынды 30-дан аса мультфильм көрсетіледі.