“Ўзэнергоинспекция” бошқарма бошлиғи Олимхон Дўстмуҳамедовнинг маълум қилишича, тегишли ташкилотлар билан ҳамкорликда ўтказилган назорат тадбирларида 358 та истеъмолчи томонидан табиий газ ва электр энергиясидан қоидабузарлик билан фойдаланиш ҳолатлари аниқланган.

Унга кўра, 25,4 миллион метр куб табиий газ (62,2 миллиард сўм) ва 29,4 миллион киловатт-соат электр энергияси (35,8 миллиард сўм) талон-торож қилиниб, давлат манфаатларига жами 98,1 миллиард сўм зарар етказилган.

Шунингдек, 370,8 тонна нефть маҳсулотлари (6,3 миллиард сўм) белгиланган талабларга зид равишда ишлатилган. 

Қонунбузарликлар асосида 342 та маъмурий иш расмийлаштирилган. Уларнинг 142 таси электр энергияси, 200 таси эса табиий газдан ноқонуний фойдаланиш билан боғлиқ.

Қиш мавсумини барқарор ўтказиш мақсадида ҳудудлардаги подстанциялар ва трансформатор пунктларидаги контактлар ҳамда больтли бирикмаларда қизиш ҳолатлари тепловизор орқали ўрганилган. Натижада 1 364 та объектда 4 134 та меъёрдан ортиқ қизиш ҳолати қайд этилган. Шулардан 941 таси бартараф этилган, масъул шахсларга тегишли чоралар кўрилган.

Бошқарма бошлиғи қайд этганидек, хавфсизлик талаблари бузилган ҳолатлар ўрганилиб, 37 та бригада фаолияти текширилган. Олиб борилган ишлар натижасида 16 та бригада ишдан четлатилган.

– Нефть маҳсулотлари бўйича сифат назорати тадбирларида АЁҚШ ва корхоналардан олинган таҳлил намуналаридан 23 та ҳолатда 275,3 минг литр сифатсиз маҳсулот аниқланиб, унинг сотуви тўхтатилган. Бундан ташқари, “Ўзэнергоинспекция” томонидан 214 МВт қувватга эга 1 055 та объектнинг электр таъминоти лойиҳалари экспертизадан ўтказилган. Натижада 733 та истеъмолчининг тармоққа уланишига рухсат берилган. Шунингдек, 17 та объектнинг электр таъминоти лойиҳалари келишилиб, 13 та қурилманинг ишга тайёрлиги бўйича хулоса берилган, – деди О.Дўстмуҳаммедов.

Шуни алоҳида таъкидлаш керакки, энергия ресурсларидан ноқонуний фойдаланиш ортиқча юкланишга ва тизим барқарорлигига салбий таъсир кўрсатмоқда.

Н.Зиёдуллаева, ЎзА