Музработ коррупциядан холи обод туманга айланади

Сурхондарё вилоятининг Музработ тумани ҳокимлигида 9 декабрь – Халқаро коррупцияга қарши кураш куни муносабати билан техникум ва умумтаълим мактабларининг битирувчи ёшлари учун учрашув ташкил этилди.

Унда туман ҳокими Абдулла Маматқулов, туман прокурори Исломбек Хўжамуродов ёшлар билан очиқ мулоқот қилиб, коррупциянинг салбий оқибатлари ҳақида фикр алмашди. Давлат ва жамият тараққиётига, халқнинг адолатга бўлган ишончига жиддий путур етказадиган коррупция келиб чиқиш хавфининг олдини олиш ва унга қарши курашиш юзасидан амалга оширилаётган ишлар, туманда олиб борилаётган ислоҳотлар, келгусидаги режалар билан таништирди. Туман ҳокимлигида коррупцияга қарши курашиш, бошқарувдаги очиқлик ва шаффофликни таъминлаш йўлида аниқ мақсадга йўналтирилган чора-тадбирлар тўғрисида етарли маълумот берилди. Иштирокчилар ўзларини қизиқтирган саволларга атрофлича жавоб олди.

Тадбир якунида ўғил-қизлар ҳокимлик тизими, бўлим ва ходимларнинг иш жараёнлари билан яқиндан танишиб, давлат бошқарувидаги шаффофлик, ҳалоллик ва масъулият бўйича ўз тасаввурларини янада бойитди. 

Холмўмин Маматрайимов, ЎзА