Тошкент вилояти Пискент туманида ўзбек жанг санъати бўйича 7 ёшдан 17 ёшгача бўлган ёшлар ўртасида очиқ турнир биринчилиги ўтказилди.

Президентимиз томонидан илгари сурилган 5 та муҳим ташаббус ёшларнинг бўш вақтини мазмунли ташкил этиш, жумладан, уларни спортга кенг жалб этишда муҳим аҳамият касб этмоқда.

Вилоят, шу жумладан, Пискент туманининг олис ва чекка қишлоқлари, таълим муассасаларида 5 та муҳим ташаббус доирасида мунтазам соғлом турмуш тарғиботига бағишланган тадбирлар, спорт мусобақалари ўтказиб келинмоқда. Ўз навбатида, бундай тадбирлар туман ёшларининг бўш вақтидан самарали фойдаланиб, жисмонан соғлом бўлиб улғайишига замин яратаётир.

Тумандаги болалар ва ўсмирлар спорт мактабида бўлиб ўтган беллашувда вилоят туман ва шаҳарларидан 360 нафардан ортиқ ёш спортчилар иштирок этди.

Мусобақа якунида Ўрта Чирчиқ тумани вакиллари биринчи ўринни қўлга киритди. Нурафшон шаҳри жамоаси эса иккинчи ўринга сазовор бўлди. Мезбон жамоа – пискентлик ёш ўзбек жанг усталарига учинчи ўрин насиб этди.

Ғолиб ва совриндорлар махсус диплом ҳамда эсдалик совғалари билан тақдирланди.