Халқ депутатлари Самарқанд вилояти Кенгашининг бугун ўтказилган сессиясида Ўзбекистон Республикаси Президенти сайловини ўтказувчи Cамарқанд округ сайлов комиссияси аъзолигига номзодлар тавсия этиш тўғрисидаги масала ҳам кўриб чиқилди.

Депутатлар жамоатчиликнинг обрў-эътиборли вакиллари орасидан 21 кишидан иборат комиссия таркибини шакллантириб, тасдиқлаш учун Марказий сайлов комиссиясига тақдим этишга қарор қилди.

Ўзбекистон Республикасининг Сайлов кодексига кўра, Ўзбекистон Республикаси Президенти сайловини ўтказиш бўйича округ сайлов комиссияси Марказий сайлов комиссияси томонидан сайловга камида етмиш кун қолганида комиссия раиси, раис ўринбосари, котибидан ва комиссиянинг саккиз – ўн саккиз нафар бошқа аъзоларидан иборат таркибда тузилади.

Қонунчиликка кўра, Ўзбекистон Республикаси Президенти сайловини ўтказиш бўйича округ сайлов комиссиялари аъзолигига номзодлар Қорақалпоғистон Республикаси Жўқорғи Кенгесининг, халқ депутатлари вилоятлар ва Тошкент шаҳар Кенгашларининг мажлисларида муҳокама қилинади ҳамда Марказий сайлов комиссияси томонидан тасдиқлаш учун тавсия этилади.

Марказий сайлов комиссияси 2021 йил 15 августгача округ сайлов комиссияларини тузиш тўғрисида қарор қабул қилади.

Ғ.ҲАСАНОВ, ЎзА