Ўзбекистон Республикаси Давлат солиқ қўмитаси ҳузуридаги Кадастр агентлиги томонидан давлат кадастрларини шакллантириш борасида амалга оширилаётган ишлар ҳақида агентликнинг матбуот хизмати раҳбари Неъмат Атамуратов ЎзА мухбирига қуйидагиларни сўзлаб берди.

- Кадастр агентлигининг ҳудудий бошқарма ҳамда уларнинг қуйи тизимлари томонидан кадастр базасида 2021 йил 31 май ҳолатига 7 миллион 830 мингта кўчмас мулк объекти тўғрисидаги маълумотлар шакллантирилди, – дейди Н.Атамуродов. – Кадастр агентлиги ташкил этилганига бир йил бўлди. Мазкур вақт давомида агентлик томонидан 275 мингта янги объект хатловдан ўтказилди. Шунингдек, хатловларда 359 мингта кўчмас мулк объектида қўшимча қурилмалар аниқланиб, кадастр баҳоси қайта кўриб чиқилди.  

Кўчмас мулкка бўлган ҳуқуқни рўйхатдан ўтказишда эса 2020 йилнинг сентябридан 2021 йил бугунги кунига қадар 553 мингдан ортиқ объектлар давлат рўйхатидан ўтказилди. Бугунги кунда Тошкент ҳамда Фарғона вилоятларида юридик ва жисмоний шахсларга тегишли ер участкалари ва бино-иншоотларни хатловдан ўтказиш ишлари давом эттирилмоқда.

Бундан ташқари, жорий йил 1 майдан бошлаб қишлоқ хўжалиги ерларидан фойдаланувчиларни давлат рўйхатидан ўтказишни электрон шаклда амалга ошириш, маълумотларни автоматик давлат реестрига киритиш ҳамда очиқ геопорталда онлайн акс эттириш тизими жорий қилинди.

Мазкур тизим, аввало, қишлоқ хўжалиги ерлари ва ундан фойдаланувчилар ҳисобини тўлиқ электрон юритиш имконини берса, иккинчидан, ердан фойдаланувчилар, жумладан, фермер хўжаликлари ҳуқуқини кафолатлайди (уларнинг қўлида расмий кадастр ҳужжати бўлади).

Янги – ArcGIS дастурида онлайн геопортал синов тарзида ишга туширилди.

Бугунги кунда “Кадастр ва рўйхатдан ўтказиш интеграциялаштирилган ахборот тизими”да қишлоқ хўжалиги, фермер хўжаликларининг ер майдонларини рўйхатдан ўтказиш амалиёти йўлга қўйилди.  

Бундан ташқари, Қашқадарё вилоятида ўтказилган хатловда кўчмас мулк объектларининг ҳуқуқий ҳолатини аниқлаш учун объектлар тажриба тариқасида қизил (ноқонуний қурилган), сариқ (ҳужжатлари тўлиқ эмас ёки ҳужжати бўлмаса-да қуриш мумкин бўлган ерга қурилган) ва яшилга (ҳужжатлари тўлиқ) ажратилди.

Кадастр тизимида олиб борилаётган ислоҳотлар натижасида бюджетга 401,1 миллиард сўм қўшимча манба аниқланди. 2021 йил 4 ойи давомида 11 минг 568 та бўш ер участкаси (725 гектар) “YERELEKTRON” ахборот тизимига жойлаштирилди. Шундан, 5 минг 374 та бўш ерлар ваколатли органлар томонидан ахборот тизимида келишувдан ўтказилиб, «E-IJRO AUKSION» ягона электрон савдо майдончасига чиқарилган ва уларнинг 3 минг 525 таси сотилган.

Шаҳноза МАМАТУРОПОВА, ЎзА