Энергетика вазирлиги ҳузуридаги “Ўзэнергоинспекция” томонидан энергия ресурсларини талон-торож қилиш билан боғлиқ ҳуқуқбузарликларни аниқлашга қаратилган назорат тадбирлари олиб борилмоқда.

Уларда аниқланишича, жорий йилнинг ўтган даврида фермер хўжаликлари томонидан сув насосларидан фойдаланиш бўйича 675 та ҳолатда 54,1 миллиард сўмлик (361,2 млн. кВт-соат) электр энергияси ўғринча ишлатилган.  

Хусусан, Бухоро вилоятида фаолият юритувчи фермер хўжаликлари масъул шахслари қуввати 55 кВт бўлган сув насосини тижорат мақсадида электр тармоғига ўзбошимчалик билан яширинча улаб, 3,9 миллиард сўмлик электр энергиясидан ноқонуний фойдаланган.  

Шу каби Жиззах вилоятида фаолият юритувчи “М.Б.”, “Л.М.” ҳамда “У.С.” фермер хўжаликлари тижорат мақсадида сув насосларини электр ҳисоблагичдан ташқари яширин йўллар билан тармоққа улаб, 745,3 миллион сўмлик электр энергиясини ноқонуний ишлатган, дейилади “Ўзэнергоинспекция” ахборот хизмати хабарида.  

Н.Зиёдуллаева тайёрлади,  

ЎзА