Мамлакатимизда жорий йилнинг 1 июлига қадар 51 мингдан ортиқ якка тартибдаги тадбиркор рўйхатдан ўтказилди.

Президентимизнинг 2021 йил 28 апрелдаги «2021 йилда янги иш ўринларини ташкил этиш ва аҳоли бандлигига кўмаклашиш бўйича давлат дастури тўғрисида»ги қарори билан алоҳида давлат дастури тасдиқланган эди.  

Унда аҳоли бандлиги ва даромадларини оширишга ҳар томонлама кўмаклашиш, ишсизлар, айниқса, ёшлар ва хотин-қизларни иш билан таъминлаш учун ҳар томонлама ёрдамнинг янги, таъсирчан механизмларини жорий этиш вазифаси белгиланди. Меҳнат бозорига илк бор кириб келаётган битирувчилар бандлигини таъминлаш, эҳтиёжманд аҳолини меҳнат фаолиятига жалб қилишда қулай шарт-шароитлар яратишга алоҳида урғу берилди. Шунингдек, янги иш ўринларини ташкил этган тадбиркорлик субъектларини рағбатлантириш чоралари ҳам белгиланди.  

Якка тартибдаги тадбиркорлик, шу жумладан, ҳунармандчиликни ривожлантириш орқали иш ўринларини ташкил этиш ҳам 2021 йилда янги иш ўринларини ташкил этиш ва аҳоли бандлигига кўмаклашиш бўйича давлат дастурига киритилган. Дастурга мувофиқ, жорий йил 1 июль ҳолатига 51 мингдан ортиқ якка тартибдаги тадбиркор рўйхатдан ўтказилди. Шундан 6 минг 548 таси ҳунармандлар ҳисобига тўғри келмоқда.  

Янги ташкил этилган ЯТТлар томонидан 3 минг 838 та ишчи ёлланган бўлиб, жами яратилган иш ўринлари 54 минг 841 тани ташкил этмоқда.  

Таҳлилар шуни кўрсатадики, жорий йилнинг ўтган даврида якка тадбиркорлар ўтган йилнинг мос даврига нисбатан кўпроқ эканлиги тадбиркорлар томонидан мавжуд имтиёзлардан самарали фойдаланаётганликлари ва бунинг натижасида ишсиз фуқароларимиз иш билан банд бўлаётгани таҳсинга лойиқ.  

Шаҳноза Маматуропова, ЎзА