Жорий йилнинг 26 январь ҳолатига кўра, 5 граммлик олтин қуйманинг нархи 10 миллион сўмдан ошиб, 10 миллион 36 минг сўмни ташкил этди. 10 граммлик олтин қуйманинг нархи эса 20 миллион 73 минг сўмга етди.

Бу ҳақда Марказий банк маълум қилди.

Қайд этилишича, Comex биржасида 2026 йил февраль ойида етказиб бериладиган олтин фьючерсларининг қиймати тарихда илк бор бир трой унция учун 5000 доллардан ошди. Нашр вақтида бир трой унция олтин нархи 5067,9 долларни ташкил этмоқда.  

Шунингдек, кумуш фьючерслари нархи ҳам янги максимумни янгилаб, илк бор бир трой унция учун 105 доллардан ошди. Маълумот ўрнида айтиш жоиз, Ўзбекистон Марказий банки 2020 йилдан бошлаб олтин қуймаларини сотишни йўлга қўйган.  

Жорий йил январь ойидан эса регулятор илк бор олтин қуймаларини қайта сотиб олиш нархларини ҳам эълон қила бошлади. Олтин қуймаларини сотиш ва харид қилиш нархлари ҳар куни Марказий банкнинг расмий веб-сайтида миллий валютада эълон қилиб борилади.    

Ш.Маматуропова,

ЎзА