–Мумкин, буни уддалаган аёллар жуда кўп, –дейди Самарқанд вилоят хотин-қизлар тадбиркорлик маркази раҳбари Сайёра Салимова.

Нодавлат нотижорат ташкилоти мақомидаги мазкур марказ давлатимиз раҳбарининг 2019 йил 7 мартдаги “Хотин-қизларнинг меҳнат ҳуқуқлари кафолатларини янада кучайтириш ва тадбиркорлик фаолиятини қўллаб-қувватлашга оид чора-тадбирлар тўғрисида”ги қарори асосида ташкил этилган ва 2019 йил август ойида фаолият бошлаган. Марказ Хотин-қизларни ва оилани қўллаб-қувватлаш давлат мақсадли жамғармаси маблағлари ҳисобидан молиялаштирилади.

– Аёлнинг тадбиркор бўлиши фақат оила учун эмас, бутун жамият учун манфаат келтиради, қўшимча имкониятлар, янги ғоялар ва янги иш ўринлари яратилади, – дейди Сайёра Салимова. – Бизнинг вазифамиз ана шу мақсад йўлида аёлларимизга кўмаклашиш, уларни қўллаб-қувватлаш. Уларга ҳунармандчилик, тадбикорликни ўргатамиз, шу фаолият билан шуғулланаётган бўлса, ишини ривожлантиришга ёрдам берамиз. Асосан маҳаллалардаги ижтимоий кўмакка муҳтож, “Аёллар дафтари”да рўйхатга олинган хотин-қизлар билан ишлаб, кам имкониятлардан юқори натижага эришишга ҳаракат қиламиз. Туман (шаҳар) оила ва хотин-қизлар бўлимлари билан ҳамкорликда ишлаймиз ва уларнинг таклифлари, маҳаллалардан берилган рўйхат асосида ҳунармандчилик ва тадбиркорлик билан шуғулланиш истагини билдирган хотин-қизлар учун жойларда 36 соатлик ўқув курслар ташкил этамиз. Дарс машғулотлари малакали тренинг ўқитувчилар томонидан олиб борилади. Мазкур курсларни битирган хотин-қизларимизга сертификат берамиз ва улар бу сертификат билан тижорат банкларидан ҳеч қандай кафил ва гаровсиз, имтиёзли кредит олиб, тадбиркорлик фаолиятини йўлга қўяди. Марказ сертификати кредит учун кафил ҳисобланади.  

Марказ ташкил этилган дастлабки йилда 396 нафар хотин-қиз касб-ҳунар ва тадбиркорликка ўқитилган бўлса, кейинги йилларда бу рақам муттасил ўсиб борди ва 2024 йилда 8726 нафар хотин-қиз тикувчилик, каштачилик, оддий металдан замонавий тақинчоқлар ясаш, пазандачилик, компьютер саводхонлиги, чорвачилик, паррандачилик, иссиқхона ташкил этиш, гулчилик, асаларичилик курсларини муваффақиятли битирди.  

Ўтган йили марказда ўқиган аёлларнинг 5572 нафари ишга жойлаштирилган, ўзини-ўзи банд қилган. 400 нафари якка тартибдаги тадбиркор сифатида рўйхатдан ўтган. 584 нафар хотин-қиз кредит олиб ўз фаолиятини бошлаган.  

– Бу йил ҳам 12 йўналиш ҳамда “Сайхунобод тажрибаси” асосида ўқув дастурлари тайёрланиб, туман ва шаҳарларда “Аёллар дафтарида”да рўйхатга киритилган 7200 нафар опа-сингилимизни касбга йўналтириш ва иш билан таъминлаш режалаштирилган, – дея сўзида давом этади Сайёра Салимова. – Йилнинг ўтган саккиз ойида 3791 нафар хотин-қиз касб-ҳунар ва тадбиркорликка, 1221 нафари “Сайхунобод тажрибаси” бўйича оилавий тадбиркорликка ўқитилди.  Шу пайтгача 2805 нафарининг  бандлиги таъминланди.  

Бундан ташқари, йил бошидан буён 500 дан ортиқ хотин-қизлар иштирокида бизнес режа тузиш ва молиявий саводхонлик бўйича ўқув ва амалий тренинглар ташкил этилди. 120 нафар хотин-қиз ўзлари танлаган йўналишларни мувафаққиятли битириб, зарур билим ва кўникмага эга бўлгач, сертификатлар берилди ва улар шу сертификат орқали имтиёзли кредитлар олди. 30 та янги оилавий тадбиркорлик субъекти ташкил этилди. Вилоят оила ва хотин-қизлар бошқармаси билан ҳамкорликида “Аёллар инновацияси” танлови ўтказилиб, 15 та ғолиб лойиҳа ҳаётга татбиқ этилди.

[gallery-25255]

– Аввалдан тикувчилик билан шуғуллансам-да марказ ташкил этилган 2019 йилда илк тингловчилар қаторида шу йўналишда ўқиб, бу ишни тадбиркорликка айлантирдим, – дейди Жомбой тумани Ҳалвойи маҳалласида яшовчи Юлдуз Қодирова. – Имтиёзли кредит олиб, бешта тикув машинаси харид қилдим ва қўни-қўшниларимни ёнимга олиб, кўрпача, кўрпа тикишни йўлга қўйдик. Дастлаб ўзимизнинг маҳалламиз ва атрофдаги қишлоқларга маҳсулотимизни сотган бўлсак, ҳозир интернет орқали республикамиз бўйича буюртмалар оляпмиз. Марказнинг ёрдами билан уйда иссиқхона ташкил қилдим, гулчилик билан шуғулланяпман. Туманимиздаги корхона ва ташкилотларга йилнинг тўрт фаслида гул етказиб берамиз. Бу ишда ҳам маҳалламиздаги беш нафар хотин-қизни иш билан таъминлашга эришдим. Лекин бу билан чекланиб қолмоқчи эмасман, бошқа йўналишлар ҳисобига тадбиркорлик фаолиятимни кенгайтириш ниятидаман. Хотин-қизлар тадбиркорлик маркази билан яқин ҳамкорлик менга кўплаб ишбилармон аёллар билан танишиш, улар билан тажриба алмашиш имкониятини берди. Бир вақтлар ўрганувчи эдим, энди мен ҳам бошқаларга ўз тажрибаларимни ўргатяпман.

Ғ.Ҳасанов, А.Исроилов (сурат), ЎзА мухбирлари