Бугунги кунда психотроп моддалар ёхуд кучли таъсир қилувчи дори воситаларини истеъмол қилувчилар сони кўпайиб бораётгани сир эмас. Бу иллат, айниқса, ёшлар ўртасида ҳам тарқалаётгани ачинарли ҳолатдир. Республика ихтисослаштирилган наркология илмий-амалий тиббиёт маркази Тошкент шаҳар филиалида ана шу каби оғуга ружу қўйган инсонлар даволанади.

ЎзА мухбири марказда бўлиб, бу ерда даволанаётган бир нечта беморлар билан суҳбатлашди.  

Улардан бири 31 ёшли А. исмли йигит. У гарчанд айни камолотга етган ёшда бўлсада озғин жуссаси, тўкилган тишлари ва юзидаги турли чандиқлар уни тамоман дорининг қулига айланиб қолганини англатади.  

Айтишича, уни дори истеъмол қилишга кўчада орттирган дўстлари қизиқтирган, истеъмол қилиб кўришни тавсия қилган. Бошида бир-икки марта ичиб, сўнг ташлайман деб ўйлаган. Аммо бошқа гиёҳвандлар қатори бу оғудан қутула олмаган. Синтетик дориларни асосан интернет тармоғи орқали сотиб олган.  

– Яхши бир хориж фирмасида иш юритувчи бўлиб ишлардим, –дейди у биз билан суҳбатда. Дори қабул қилаётганимни, ширакайф аҳволда юрганимни сезиб қолишгач, ишдан бўшатишди. Кейин яқинларимни алдаб пул олиб юрдим, уйдаги нарсаларни сотишни бошлаганимдан сўнг онам сезиб қолди. Баъзида пул топсамда лекин белгиланган жойда дори бўлмасди. Алам қиларди, яна пул топиш учун ўғриликка ўтдим. Қамоқда ҳам ўтириб чиқдим. Отам ёшлигимда оламдан ўтган. Онам мени бир ўзи ёлғиз катта қилган. Онам бу йўлдан қайтаришга бир неча марта уриниб кўрди. Мен эса онамнинг кўз ёшларини сезмасдим. Фикри хаёлим дори топишда эди. Охир оқибат онам кучли юрак хуружидан оламдан ўтди.  

Ҳамма яқинларим, дўстларим мендан юз ўгирди. Топган пулимни бир лаҳзалик кайфга сарфладим. Уйланиб, оила қурмадим. Ўғил бўлиб онамнинг ёнига иккита нон кўтариб келмадим. Бу йўлнинг охири жарлик экан. Дори мени енгди ва бутунлай ҳолсизланиб ётиб қолдим. Бутун аъзойи баданим қақшаб оғриб, юришга кучим қолмади. Қариндошларимнинг тавсияси билан шу шифохонада даволаняпман. Ҳозир анча ўзимни яхши ҳис қиляпман. Бу ерда даволаниш бепул. Шифокорлар беморларни оғу таъсиридан қутқариш учун ҳам жисмоний, ҳам руҳий жиҳатдан даволашар экан.  

Ёшларга айтадиган гапим: ҳеч қачон дори истеъмол қилишмасин.  

Синтетик дори унинг қулига айланган одамнигина эмас, бир нечта одамларнинг бошига етаркан. Синтетик дорилар қабул қилишдан чарчадим. Кеч бўлсада кўзим очилди. Энди бу ёғига йўқотилган соғлиғимни тиклаб, шифокорлар назорати остида соғлом турмуш тарзига амал қилиб яшашга қарор қилдим, дейди у.  

<iframe width="560" height="315" src="https://www.youtube.com/embed/SgpUdnclpOQ?si=oM_jt9YefnKZwM7T" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Н.Раҳмонова, А,Аҳмедов (видео), ЎзА