Ўтаётган ҳар бир кун бизни энг улуғ, энг азиз байрам – Ватанимиз мустақиллигининг ўттиз бир йиллик тантаналарига яқинлаштирмоқда.

Айни шу дамларда мамлакатимизнинг барча ҳудудларида "Янги Ўзбекистонда эл азиз, инсон азиз!" бош ғоясини ўзида мужассам этган байрам тадбирлари бошланди.

Наманганда Ўзбекистон “Миллий тикланиш” демократик партияси вилоят кенгаши ташаббуси билан мустақиллик тенгдошларини ўзида жамлаган “31 йилликнинг 31 иқрори” маънавий-маърифий тадбири ҳам айни шу мақсадга қаратилди.

Давлатобод туманидаги “Янги Ўзбекистон – ёшлар зиё маскани” ахборот кутубхонасида бўлиб ўтган тадбирда ЎзМТДП вилоят кенгаши раиси Дилноза Азизова, вилоят Маҳалла ва нуронийларни қўллаб-қувватлаш бошқармаси бошлиғи, вилоят Кенгаши депутати Аҳмаджон Аълохўжаев, Ёшлар ишлари агентлиги вилоят бошқармаси бошлиғи, ўзи ҳам 31 ёшни қаршилаган Бахтиёр Мирзатов бугунги кунда эртанги кунимизнинг бунёдкорлари саналган ёшларга яратилаётган шарт-шароитлар, қулай имкониятлар хусусида тўхталиб ўтди.

Таъкидланганидек, 2022-2026 йилларга мўлжалланган Янги Ўзбекистоннинг тараққиёт стратегиясини амалга ошириш, бугунги ислоҳотларни янги босқичга кўтариш, инсон ҳуқуқ ва манфаатлари, унинг қадри, шаъни ва ғурурини етакчи ўринга олиб чиқиш устувор вазифамизга айланди. Айниқса, сўнгги йилларда Янги Ўзбекистонни барпо этиш ва уни жаҳонга танитишга хизмат қилаётган натижалар халқаро жамоатчилик томонидан эътироф этилмоқда.

Тадбир якунида ЎзМТДП раҳбарияти номидан 31 нафар ёшга 31 номдаги китоблар тўплами тақдим этилди. Шунингдек, миллий тикланиш ғояларига хайрихоҳ бўлган бир қатор ёш ўғил-қизлар партия сафларига қабул қилиниб, уларга эсдалик совғалари топширилди.

Оқилхон Дадабоев, ЎзА