Ахборот ва оммавий коммуникациялар агентлигида ташкил этилган брифингда Савдо-саноат палатаси бошқарма бошлиғи Бобур Ибодуллаев томонидан соҳага оид маълумотлар тақдим этилди.

Қайд этилишича, 20 та назорат қилувчи органнинг 817 нафар мансабдор шахси тадбиркорлик субъектлари фаолиятида текширув ўтказишда махсус гувохнома олиш учун аттестациядан ўтказилди.  

Жорий йилда Коррупцияга қарши курашиш Хартиясига қабул қилиш бўйича комиссиянинг 5 та йиғилиши ўтказилиб, 300 га яқин тадбиркорлик субъекти Хартия аъзолигига қабул қилинди. Палатага қонун билан тадбиркорлик соҳаси қонунлари ижроси устидан жамоат назоратини олиб бориш ваколати берилган.  

Шунингдек, 2022 йилнинг ўзида 807 та норматив-ҳуқуқий ҳужжат лойиҳалари бўйича жамоатчилик экспертизаси ўтказилди. Шундан 492 та лойиҳа бўйича тадбиркорлик фаолияти ривожига тўсқинлик қилувчи ёки чекловчи норматив-хуқуқий ҳужжатларга ўзгартиш ва қўшимчалар киритиш, шунингдек, уларни қабул қилиш мақсадга мувофиқ эмаслиги тўғрисида тавсиялар баён этилган хулосалар берилди.  

Коррупцияга қарши курашиш агентлиги, Бизнес-омбудсман ва Савдо-саноат палатаси томонидан тадбиркорлар Ўзбекистон бизнесининг коррупцияга қарши курашиш Хартиясига қабул қилинди. Мазкур Хартияга қўшилган ҳар бир тадбиркор ўз-ўзидан “Мен ҳалол фаолият юритаман” деган вазифани ўз зиммасига олади.  

Муҳайё Тошқораева,  

ЎзА