Венгрия Республикаси Европа марказида, Дунай дарёси ўрта оқимида жойлашган, пойтахти Будапешт. Маъмурий жиҳатдан 19 вилоят (медье)га бўлинади. Будапешт алоҳида маъмурий бирлик.

Ушбу демократик давлатнинг 1949 йил 20 августда қабул қилинган амалдаги конституциясига бир неча бор ўзгариш ва қўшимча киритилган. Давлат бошлиғи – Президент мамлакат Қуролли кучлари бош қўмондони ҳам ҳисобланади, ҳукумат бошлиғини тайинлайди, қамал ёки фавқулодда ҳолат эълон қилиш ҳуқуқига эга. Унинг ваколат муддати 5 йил. Қонун чиқарувчи орган – парламент – Давлат мажлиси. Ушбу тузилмани аҳоли ялпи тенг ва яширин овоз бериш йўли билан 4 йил муддатга сайлайди. Ижро ҳокимияти – Вазирлар Кенгашига Бош вазир бошчилик қилади.

Венгрияда 8 йиллик мажбурий бошланғич таълим жорий этилган. Давлатга, черковга қарашли, хусусий ўрта ўқув юртлари бор. Будапешт университети Венгриядаги энг йирик олий ўқув юртидир. 1367 йил ташкил этилган Печ шаҳридаги университет мамлакатдаги энг қадимий ўқув юртларидан.

Венгрия Миллий музейи 1802 йил ташкил этилган, миллиондан зиёд экспонати бор.

Венгрия ОАВ – энг йирик газаталар “Халқ сўзи” (Nеpszava) кундалик газета 1873 йилдан, “Венгр миллати” (Magyar nemzet) кундалик сиёсий газета 1938 йилдан чоп этиб келинади. Шунингдек, “Кундалик янгиликлар”  (Daily News),  “Халқ эрки” (Nepsabadshag), “Озодлик” (Szabadság) каби қатор инглиз ва немис тилларидаги даврий матбуот органлари бор. Бир неча электрон нашр мавжуд.

Мамлакат радиоси 1924 йил, телевидениеси 1957 йилдан фаолият кўрсатади.

2015 йил 1 июлда телевидение, радио ва Дуна ТВ “Дуна Медиа” агентлигига бирлаштирилган.

ЮНЕСКО ҳисоботига кўра, “Дуна Медиа” Венгриядаги энг ишончли ва мувозанатли ахборот ресурсларидан бири сифатида тавсифланади, Мамлакатдаги газеталарнинг аксарияти хорижий фуқароларга тегишлилиги сабаб, агентлик обуначи топишга қийналмоқда.

Агентлик, нодавлат оммавий ахборот воситалари, жумладан инглиз тилидаги “Budapest Business Journal” ва “The Budapest Sun” нашрлари, турли телерадиокомпаниялар веб-сайти, Reuters ва “Agence France-Presse” кўмагида яратилган Венгрия ахборот агентликлари рақобатига дош беришда ҳам мураккаб вазиятга дуч келяпти.

1881 йил 1 мартда ташкил этилган Венгрия ахборот агентлиги Миллий Ассамблея томонидан асос солинган Телеграф агентлиги компаниясига тегишли бўлиб, ушбу жамоанинг маслаҳат органи аъзолари МА томонидан тўрт йилга сайланади.

Эслатиб ўтамиз, Ўзбекистон ва Венгрия 1992 йил 3 март куни дипломатия муносабатини ўрнатган.

ЎзА