Енгил саноат технологияси факультетининг дизайн (костюм) таълим йўналишига 50 ўрин учун 291 талабгор ҳужжат топширган эди. Ижодий имтиҳоннинг сўнгги кунида 93 нафар абитуриент келиши белгилаб қўйилганди. Уларнинг 8 нафари имтиҳонга келмади. 3 кун давом этган имтиҳон жараёнларида жами 238 абитуриент иштирок этган бўлса, 53 талабаликка талабгор турли сабабларга кўра қатнашмади.

— Ижодий имтиҳонлар карантин талабларига тўлиқ риоя этган ҳолда ўтказилди, — деди Наманган муҳандислик-технология институти қабул комиссияси масъул котиби Аъзамхўжа Мамахонов. — Институтга кириш жойлари тана ҳароратини ўлчаш учун пирометр билан жиҳозланди. Махсус тиббий ходимлар томонидан ҳар бир абитуриентнинг ҳарорати ўлчаниб, уларга тиббий ниқоб ва тиббий қўлқоплар тарқатилди. 

Институт ҳовлисида касбий (ижодий) имтиҳон ўтказилаётган жой атрофига 6 камера ўрнатилиб, жараёнлар институт сайти ва ижтимоий тармоқлардаги саҳифалари орқали тўғридан-тўғри кўрсатиб борилди. Имтиҳон жараёнларини Камолиддин Беҳзод номидаги Миллий рассомлик ва дизайн институтининг профессор-ўқитувчиларидан иборат баҳолаш комиссияси аъзолари, маҳаллий Кенгашлар депутатлари, Ёшлар ишлари агентлиги вакиллари ва оммавий ахборот воситалари ходимлари кузатиб борди. 

Пандемия муносабати билан бир босқичда ташкил этилган ижодий имтиҳонда абитуриентлар композиция асосида ўзларига берилган мавзу доирасида бадиий маҳоратларини синовдан ўтказди. Баҳолаш комиссияси аъзолари абитуриентларнинг ижодий ишларини баҳолаб бўлганидан кейин, унинг натижалари институтнинг nammti.uz сайтида эълон қилинади. 

Маълумот ўрнида, 2020-2021 ўқув йилида Наманган муҳандислик-технология институтига кундузги ва сиртқи таълим шаклларида 30 та бакалавриат таълим йўналишига 2 минг талаба қабул қилинади. Қабул кўрсаткичлари сўнгги 3 йил ичида 3 баробарга ортди. Бу йил 11 минг 561 абитуриентдан ўқиш учун ҳужжат қабул қилинди.