Butunjahon turizm kuni tarixi 1925 yilda Gaagada Rasmiy sayyohlik tashkilotlari Xalqaro kongressi tashkil etilgan kunga taqaladi. Hozirda u Jahon sayyohlik tashkiloti (United Nations World Tourism Organization – UNWTO) deb nomlanadi. Aynan ushbu tashkilot tomonidan 1979 yilda Butunjahon turizm kuni ta’sis etildi. U sayohatlar sohasida xalqaro hamkorlikni rivojlantirishga e’tibor qaratishga yo‘naltirilgan. Ayni paytda jahon yalpi milliy mahsulotining qariyb 6 foizi turizm sohasiga to‘g‘ri kelmoqda, dunyo bo‘yicha sayyohatlar soni esa taxminan 1,3 milliardni tashkil etadi.

Har yili  millionlab insonlar yangi joylar, boshqa xalqlarning  madaniyati, urf-odati va turmush tarzi bilan tanishish maqsadida dunyo bo‘ylab sayohatga chiqadi. Insonlar va hamjamiyatlar o‘rtasidagi bunday hamkorlik  butun dunyoda tinchlik hukm surishi uchun zarur bo‘lgan xalqlar o‘rtasidagi bag‘rikenglik  va o‘zaro hurmat mustahkamlanishiga  xizmat qiladi.  

Jahon sayyohlik tashkiloti  har yili  bayram shiorini e’lon qiladi, bu yilgi bayram shiori “Sayyohlik va tinchlik” deb nomlanadi.  

Roman BONDARCHUK tayyorladi,  O‘zA