Бу Хоразмда тайёрланаётган 9 тонналик паловнинг масаллиғи.

Айни дамда "Арда Хива" туризм мажмуасида "Хоразм палови" халқаро ош фестивали бўлиб ўтмоқда. 

Ушбу халқаро гастрофестивалида республикамизда ва бутун дунёда машҳур ошпазлар иштирок этиб, мамлакатимизда илк бор рекорд оғирликдаги 9 тонна палов-ош тайёрланади.

—Хабарингиз бор, кўп йиллардан буён мамлакатимизнинг турли ҳудудларида катта ҳажмдаги ош тайёрлаш анъанаси пайдо бўлган, —дейди фестивалнинг бош ошпази Абдуманнон Нусратов. – Сал аввалроқ, Наманганда 5,8 тонна, Самарқандда 7 тонна, Деновда 8 тонна ош тайёрлаган эдик. Бугун Хивада шу кунгача бўлган энг кўп паловни тайёрламоқдамиз. 2,5 тонна Хоразмнинг энг яхши гуручидан танланган. Овқат таёрланаётган катта дошқозон ва у ўрнатилган ўчоқ ҳам рекорд даражада. 

"Арда Хива" туризм мажмуаси олдидаги кенг майдоннинг ярмида халқаро ош фестивали давом этаётган бўлса, иккинчи ярмида байрам арчаси безатилган. 

Ўчоқ боши ва арчанинг ёнидаги катта саҳналарда эл суйган ва машҳур санъаткорларнинг байрамона чиқишлари давом этмоқда. 

Бутун дунёдан келган хорижий ва маҳаллий ОАВлар, миллионлаб кузатувчисига эга бўлган фудблоггерлари фестивални тўғридан тўғри ёритиб бормоқда. 

[gallery-26724]

Маълумотларга кўра, Хоразм палов-оши маҳаллалар, кам таъминланган ва эҳтиёжманд оилалар, “Саховат” ва “Меҳрибонлик” уйларига тарқатилиши кўзда тутилган.

Аҳмаджон Шокиров,
Беҳзод Саидов (сурат),  ЎзА