Божхона назоратидан ўтишнинг ўзига хос тартиби бор.

Афсуски, баъзида юртдошларимиз бунга амал қилмасдан қинғир йўлни тутмоқчи бўлади. Фарғона вилоятида ҳуқуқни муҳофаза қилувчи органлар томонидан кўп миқдордаги заргарлик буюмларини хорижга ноқонуний олиб кетмоқчи бўлган шахснинг қинғир иши фош этилди.

Андижон шаҳрилик И.Каримов ўзи билан олиб келган заргарлик буюмларини, божхона ходимлари топиб олмасликлари учун оёқ кийимларининг ички қисмига яшириб, Фарғона халқаро аэропортида “Фарғона-Истанбул” авиарейси билан Туркиянинг Истанбул шаҳрига учиб кетишни режа қилади. У божхона назоратининг “қизил” йўлаги орқали ҳаракатланиб, божхона текширувидан ўтгандан сўнг шубҳа остига олиниб, шахсий кўрикдан ўтказилганда қилмиши юзага чиқди. Оёқ кийимлари остида божхона назоратидан яширилган, йўловчи божхона декларациясида ёзиб кўрсатилмаган жуда кўп миқдордаги 234 миллион 168 минг 337 сўмлик 6 дона сариқ металлдан ясалган заргарлик буюмлари борлиги аниқланиб, ашёвий далил тариқасида олинган.

Фарғона вилояти ИИБ эксперт криминалистика бўлими суд-кимёвий экспертизасининг хулосасига кўра, ундан олинган сариқ рангли металлдан ясалган буюмлар асоси олтин бўлган қоришмадан ясалгани, уларнинг соф оғирлиги 792,84 граммни ташкил қилишлиги кўрсатилган.

Мазкур жиноят иши кўриб кўриб чиқилиб, И.Каримовга суд томонидан тегишли жазо тайинланди. Ундан олинган заргарлик буюмлари давлат эгалигига ўтказилди.

Маҳкамжон Абдубаннопов,
Жиноят ишлари бўйича Фарғона шаҳар судининг судьяси.
ЎзА