Халқ депутатлари Самарқанд вилояти Кенгашининг бугун ўтказилган навбатдаги сессиясида “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида” ги қонунга кўра, вилоятнинг бир қатор туман ва шаҳарларида истиқомат қилувчи 220 нафар фуқаронинг мулк ҳуқуқи қонуний тартибда эътироф этилди.

Жумладан, белгиланган тартиб асосида оқдарёлик 42 нафар, ургутлик 26 нафар, Самарқанд туманидан 25 нафар, каттақўрғонлик 24 нафар, жомбойлик 20 нафар, нарпайлик 19 нафар, пастдарғомлик 17 нафар, пахтачилик 15 нафар фуқаро ўзбошимчалик билан эгаллаб олган ер участкалари ва уларда қурилган уй-жойларга нисбатан мулк ҳуқуқига эга бўлди.

Масалан, пастдарғомлик Қаландар Қараев 1965 йилда қурилган уй-жойига нисбатан, оқдарёлик Нодира Жамалова эса 1959 йилда қуриб ва ярим асрдан ошиқ яшаб келаётган уйига расмий ҳуқуқ эгаси сифатида тан олинди.

– Яшаб турган хонадоннинг ҳужжати бўлмаса, турли масалаларда муаммоларга дуч келаверар экансан, – дейди Қ.Қараев. – Ўтган сафарги акцияда эътиборсизлик қилганимиз учун эгалик ҳуқуқи ололмаган эдик. Бу гал кадастр идораси ходимлари ўзлари уйимизга келиб, еримизни ўлчада, уй-жойимизни ва ҳужжатларни кўрди. Тегишли идоралардан ҳам хулосалар олинган бугун эгалик ҳуқуқини қўлга киритдик.

Шу пайтгача Халқ депутатлари Самарқанд вилояти Кенгаши томонидан 238 нафар фуқаронинг уй-жой ва ер участкаларига бўлган эгалик ҳуқуқи эътироф этилган эди. Энди бундай имкониятдан фойдаланганлар сони 458 нафарга етди.

Ғ.Ҳасанов, ЎзА мухбири