Саломатлик – туман бойлик. Инсон тани соғ, руҳи тетик бўлсагина, кўп ишларга қодир бўлади. Шу боис ҳам юртимизда давлатимиз раҳбари ташаббуси билан соғлом турмуш тарзини шакллантириш, касалликларнинг олдини олиш, аҳоли, айниқса ёшлар, аёллар ва кексаларни жисмоний тарбия ва спорт билан шуғулланишга жалб этиш, оммавий спортни ривожлантиришга алоҳида эътибор қаратилмоқда. Спорт, соғлом турмуш тарзи жисмоний ва маънавий саломатликнинг асоси эканлиги мунтазам тарғиб қилинади.
Бу борада қатор ҳуқуқий ҳужжатлар қабул қилиниб, уларнинг доирасида муайян ишлар тизимли йўлга қўйилган. Жумладан, Ўзбекистон Республикаси Президентининг “Оммавий спортни ривожлантириш ва соғлом турмуш тарзини ҳар бир фуқаронинг ҳаётига киритишга қаратилган чора-тадбирлар тўғрисида”ги, Вазирлар Маҳкамасининг “Аҳолининг соғлом турмуш тарзини қўллаб-қувватлаш ва жисмоний фаоллигини оширишга доир қўшимча чора-тадбирлар тўғрисида”ги қарорларига мувофиқ, сентябрь ойининг учинчи якшанба куни республика бўйича “Автомобилсиз кун” деб белгиланган.
Дарҳақиқат, бутун дунёда 22 сентябрь “Халқаро автомобилсиз кун” сифатида белгиланган. Шу муносабат билан мамлакатимизда ҳам туманлар ва шаҳарларда “Автомобилсиз кун” тадбирлари ўтказилади. “Халқаро автомобилсиз кун” муносабати билан давлат идоралари ва маҳаллий органлари раҳбарлари шахсий намуна кўрсатиб, тадбирларда фаол иштирок этишади.
Бир кун давомида автомобил ўрнига велосипеддан фойдаланиш ёки пиёда ҳаракатланиш орқали инсон ҳам ўз саломатлигига ёрдам беради, ҳам экология мусаффолигига ҳисса қўшади. Бутун дунёда ушбу сананинг белгиланиши ҳам бежиз эмас.
Бугун техника ва технологияларнинг ривожи натижасида кам ҳаракатлилик, семизлик ва бошқа турли хасталиклар кўпайиб бораётгани ҳаммамизга маълум. Ана шундай бир пайтда инсонларни пиёда ҳаракатланишга чорлаш, автомобиллардан чиқадиган заҳарли газлар миқдорини бироз бўлса-да камайтириш эвазига атроф-муҳит тозалигига ҳисса қўшиш долзарб аҳамиятга эга.
Шундай экан, “Халқаро автомобилсиз кун”дан кўзланган мақсад ва натижага ўз ҳиссамизни қўшайлик.
Муҳтарама Комилова,
ЎзА