2022 йилда ижтимоий ҳимоя, молия ва банк, тадбиркорлик, ташқи иқтисодий фаолият ҳамда божхона ишига оид 1,8 мингдан ортиқ қонунчилик ҳужжати коррупцияга қарши экспертизадан ўтказилган.

Экспертиза натижаларига кўра ҳужжатларда 350 коррупциявий омил аниқлаган.  

Давлат органлари ва ташкилотлари томонидан 293 лойиҳа коррупцияга қарши экспертизадан ўтказилгани ва уларда коррупциявий омиллар аниқланмагани тўғрисида маълум қилинган. Аммо ушбу лойиҳалар Адлия вазирлиги томонидан экспертизадан ўтказилганда, уларда 457 коррупциявий омил аниқланган.  

Адлия вазирлиги “Қонунчилик ҳужжатлари ва уларнинг лойиҳаларини тартибга солиш таъсирини баҳолаш, коррупцияга қарши экспертизадан ўтказиш” мавзусида ўтказган матбуот анжуманида шулар ҳақида сўз юритилди.  

Мутахассислар тартибга солиш таъсирини баҳолаш Ўзбекистон қонунчилиги учун янги институт эканига тўхталди. Мазкур тизим орқали муаммони ҳал қилишнинг муқобил усуллари ўрганилиши, улар қандай харажат ва оқибатларга олиб келиши таҳлил қилиниши, шунингдек, амалдаги ҳужжатларнинг самарадорлиги ва натижадорлиги баҳоланиши таъкидланди.  

Вазирлик томонидан ўтган йилда 280 лойиҳа ҳамда амалдаги 18 қонунчилик ҳужжати тартибга солиш таъсирини баҳолашдан ўтказилган.  

Мазкур жараёнда лойиҳаларнинг 136 таси уни ишлаб чиққан вазирлик ва идоралар томонидан тартибга солиш таъсирини баҳолашдан ўтказилмагани, 144 таси бўйича тўлдирилган ҳисоботлар талаб даражасида эмаслиги аниқланиб, тегишли хулосалар берилди.  

Шунга кўра тизимни самарали йўлга қўйиш бевосита кадрлар салоҳиятига боғлиқлиги учун Адлия вазирлиги масъул ходимлари билан бир қаторда бошқа вазирлик ва идораларнинг ходимларини ҳам ушбу йўналишдаги малакасини ошириш зарурати борлиги айтиб ўтилди.  

Қонунчилик ҳужжатларини тартибга солиш таъсирини баҳолашдан ўтказиш натижаларига кўра 13 ҳужжатни такомиллаштиришга қаратилган 46 таклиф ишлаб чиқилган.  

Ўтган давр мобайнида тадбиркорлик фаолиятига оид қонунчилик ҳужжатлари ва лойиҳалари тартибга солиш таъсирини баҳолашдан ўтказилган бўлса, эндиликда инсон ҳуқуқлари ва экологияга таъсири мавжуд амалдаги ҳужжатлар ва лойиҳалар ҳам тартибга солиш таъсирини баҳолашдан ўтказилади.  

Шунингдек, “коррупциядан холи қонунчилик”ни яратиш мақсадида 2026 йилгача 21 мингга яқин қонунчилик ҳужжати коррупцияга қарши экспертизадан ўтказилади.  

Н.Абдураимова, ЎзА