Мамлакатимизда иссиқлик таъминоти тизимини модернизация қилиш борасида кенг кўламли ислоҳотлар олиб борилмоқда.

Президентимизнинг 2025 йил 11 мартдаги «Уй-жой ҳамда бино-иншоотларни иссиқлик энергияси билан таъминлаш соҳасини тубдан ислоҳ қилиш ҳамда биноларнинг энергия самарадорлигини ошириш чора-тадбирлари тўғрисида»ги қарорига мувофиқ, халқ хўжалиги ва истиқомат пунктларини барқарор ва самарали иссиқлик билан таъминлаш соҳасида 2030 йилгача бўлган стратегик йўналишлар белгиланган.

Ушбу ҳужжат ижроси доирасида ички иссиқлик таъминоти тизимида бир қатор муҳим ўзгаришлар амалга оширилди. Моддий-техника заруриятларини таъминлашда энергия самарадорлиги талаблари кучайтирилди. Янги қурилишларда қуёш панеллари ва энергия тежайдиган иситиш тизимларини жорий этиш мажбурий қилинмоқда.  

2025 йил охирида Тошкентда юқори қувватли когенерация маркази фойдаланишга топширилди. Бу марказ бир вақтнинг ўзида электр энергияси ва иссиқлик ишлаб чиқариш имкониятига эга. Ушбу лойиҳа натижасида йиллик ҳисобда 876 миллион киловатт-соат электр энергияси ва 858 минг гигакалория термик энергия ишлаб чиқарилади, бу эса 35 миллион куб метр табиий газ тежаш имконини беради. Шу тармоқ орқали пойтахтнинг бир қанча туманларидаги уйлар ва ижтимоий объектлар доимий иссиқлик билан таъминланади.

Юнусобод туманидаги 4-иссиқлик маркази ҳудудида давлат-хусусий шериклик асосида барпо этилган, қуввати 100 МВт бўлган мазкур лойиҳа ана шундай муҳим ташаббуслардан биридир. Хитойнинг “CNTIC” компанияси билан ҳамкорликда амалга оширилган лойиҳа 3,5 гектар майдонда жойлашди. Уни молиялаштириш учун 65 миллион доллар тўғридан-тўғри хорижий инвестиция йўналтирилди.

Қозонхоналардан истеъмолчиларгача бўлган иссиқлик таъминоти инфратузилмаси реконструкция қилинди. Иссиқлик магистраллари янгиланди. Тармоқлар изоляцияли қувурлар билан алмаштирилди. Бу эса турли даражадаги энергия йўқотишларининг олдини олиш имконини беради.

Марказ ишга туширилиши натижасида йилига 876 миллион киловатт-соат электр энергияси ва 858 минг гигакалория иссиқлик энергияси ишлаб чиқарилади. Шу билан бирга, йилигa 35 миллион куб метр табиий газ иқтисод қилинади.

Эндиликда, пойтахтнинг Юнусобод, Олмазор, Шайхонтоҳур, Мирзо Улуғбек ва Яккасарой туманларида жойлашган жами 1 минг 846 та объект доимий иссиқлик энергияси билан таъминланади. Уларнинг 1 минг 400 таси аҳоли хонадони, қолган қисми эса ижтимоий соҳа объектларидир. Шунингдек, 292 минг хонадонга электр энергияси барқарор етказиб берилади.

Шунингдек, энергетика, ободонлаштириш, қурилиш ва сервис тармоқлари масъулларига мавсум давомида тизимли ва мувофиқлашган ҳолда ишлаш юзасидан тегишли топшириқлар берилди.

“Янги Ўзбекистон” массивларида иссиқлик таъминоти тизимини янада такомиллаштириш ишлари бошланди. “Иссиқликтаъминоти” АЖ матбуот хизматининг маълум қилишича, жами 25,6 км. иссиқлик тармоғи тортилиши ва 20 та замонавий иситиш қозони қурилиши режалаштирилган. Бу лойиҳа аҳолининг яшаш шароитларини яхшилаш, энергия самарадорлигини ошириш ва марказий иссиқлик таъминоти тизимини модернизация қилишга қаратилган.

2026 йил давомида 191,3 миллиард сўмлик маблағ йўналтирилиши орқали “Янги Ўзбекистон” массивларида жами 18 та объектда 25,6 километр иссиқлик тармоғи тортилади ҳамда 20 та замонавий иситиш қозонлари қурилиши режалаштирилган. Натижада 443 та кўп квартирали уй ва 44 та ижтимоий соҳа объекти марказий иссиқлик таъминоти тармоқларига уланади. Бу эса аҳоли ҳаётини янада қўллаб-қувватлашга хизмат қилади.

“Янги Ўзбекистон” массивлари мамлакатимизда кенг кўламли ижтимоий инфратузилма ва қулай яшаш муҳитини яратиш бўйича амалга оширилаётган чора-тадбирлар натижасидир. Ушбу массивларда 2020 йилдан бери кўп сонли уйлар қурилиб, аҳолига топширилгани маълум қилинган. Масалан, 2025 йилдаги лойиҳалар доирасида 890 та уйдан иборат 31 минг хонадонни фойдаланишга бериш кўзда тутилган эди.  

“Янги Ўзбекистон” массивларида иссиқлик тармоғини кенгайтириш фақат қулайлик яратиш билан чекланмайди, балки аҳоли саломатлиги ва яшаш шароитларини яхшилашга хизмат қилади. Марказий иссиқлик тизими қуввати ошиши биноларда энергия самарадорлигини яхшилашга, ички ҳавонинг гигиеник стандартига масъулият билан ёндашишга имкон беради.

Шаҳноза Маматуропова, ЎзА