2025 жылы Өзбекстан әуежайлары жалпы 15,5 миллион жолаушыға қызмет көрсетті. Бұл туралы «Uzbekistan Airports» баспасөз қызметі хабарлады.

Хабарламада атап өтілгендей, 2025 жылдың қорытындысы бойынша «Uzbekistan Airports» жолаушылар ағыны, әуе рейстерінің саны және жүк тасымалы көлемі бойынша тұрақты өсімді көрсеткен.

Қаңтар–желтоқсан айлары аралығында ел әуежайлары жалпы 128 972 әуе рейсіне қызмет көрсетті. Бұл көрсеткіш 2024 жылмен салыстырғанда 14 пайызға көп. Оның ішінде 92 480 рейс халықаралық бағыттарда, ал 36 492 рейс ішкі бағыттарда орындалған.

Бір жыл бойы Өзбекстан әуежайлары арқылы 15,5 миллион жолаушы сапар шекті. Бұл өткен жылмен салыстырғанда 15 пайыздық өсімді білдіреді. Жолаушылардың 12,7 миллионы халықаралық рейстерге, 2,8 миллионы ішкі рейстерге тиесілі.

Жүк тасымалы саласында да оң динамика байқалған. 2025 жылы әуежайлар арқылы 98 137 тонна жүк пен пошта тасымалданып, бұл өткен жылға қарағанда 12 пайызға өскен.

Сонымен қатар, өткен жылы Өзбекстан әуежайларына төрт жаңа халықаралық әуекомпания тартылды. Олардың қатарында Қытайдың «Air China» және «China Eastern», Кореяның «T’Way», сондай-ақ Малайзияның «AirAsia» әуекомпаниялары бар.