Өзбекстанда 2025 жылы мектеп оқулықтарын жалға алу үшін ата-аналардан ақы алынбайды.

Бұл туралы Экономика және қаржы министрлігі мәлімдеді.

Бұған дейін бюджет жобасында 2025–2026 оқу жылынан бастап 2–11 сынып оқушыларының оқулықтары үшін жалға алу жүйесін енгізу ұсынылған болатын.

«Оқулықтар толықтай мемлекеттік бюджет есебінен басылып шығуы ата-аналардың жауапкершілігін төмендетіп, оқулықтарға ұқыпсыз қарау жағдайларына әкелуде», – деп түсіндірген еді министрлік бұл ұсынысты.

12 желтоқсандағы министрлік мәлімдемесіне сәйкес, бұл жоспардан бас тартылған.

«2025 жылға арналған Мемлекеттік бюджет аясында көзделген қаражат жаңа оқу жылында оқушыларды оқулықтармен толық қамтамасыз етуге жеткілікті.

Бұл жағдайда ата-аналардан оқулықтар үшін қосымша ақы алу жоспарланбаған», – деп хабарлады министрлік.

Айта кетейік, 2024 жылы мектеп оқушылары үшін 83,2 миллион дана оқулық пен жазу дәптерлерін жеткізуге Мемлекеттік бюджеттен 1,5 трлн сум бөлінген. Бұл соманың 435,5 млрд сумы (яғни 36 пайызы) пайдалану мерзімі 1 жыл болатын және жыл сайын қайта басылып шығарылатын жазу дәптерлеріне бағытталған.

2025 жылы 81 миллион дана оқулық пен жазу дәптері үшін 1,3 трлн сумды толықтай Мемлекеттік бюджет есебінен жабу жоспарланған.

Еске салайық, мектеп білім беру жүйесінде 2022 жылдан бері оқулықтар үшін жалға алу ақысы төленбейді.