Электр таъминоти тизимида хавфсизлик, барқарорлик ва сифат талабларини таъминлаш мақсадида истеъмолчиларга давлат хизматларини кўрсатиш жараёнларида лойиҳа ҳужжатларини экспертизадан ўтказиш муҳим аҳамият касб этмоқда.

Бу ишлар натижасида электр тармоқларига уланишда белгиланган техник меъёрларга қатъий риоя этилиши, энергетика объектларининг ишга тайёрлиги ҳамда аҳоли ва тадбиркорлик субъектларини узлуксиз электр энергияси билан таъминлаш кўзда тутилади.

Шу йўналишда “Ўзэнергоинспекция” томонидан 2025 йил давомида истеъмолчиларга давлат хизматларини кўрсатиш бўйича жами 10 минг 981 та объектнинг электр таъминоти лойиҳалари экспертизадан ўтказилди.

Экспертиза натижаларига кўра, 7 минг 497 та истеъмолчининг электр қурилмаларини электр тармоқларига улашга рухсат берилди.

Шунингдек, энергетика объектларига тегишли 1 минг 786 та объектнинг қуввати 190,9 мегаватт бўлган электр таъминоти лойиҳалари келишилди. Ушбу объектлардан 471 таси бўйича умумий қуввати 16,5 мегаваттни ташкил этувчи электр қурилмаларининг ишга тайёрлиги юзасидан тегишли хулосалар берилди.

Инспекция ахборот хизматининг маълум қилишича, техник шартларсиз электр таъминотини лойиҳалаштириш, қурилиш-монтаж ишларини амалга ошириш ҳамда электр тармоқларига уланиш қатъиян тақиқланади.

Н.Зиёдуллаева, ЎзА