Олий Мажлис Қонунчилик палатасининг мажлисида депутатлар “Йўл ҳаракати тўғрисида”ги қонун лойиҳасини иккинчи ўқишда моддама-модда муҳокама қилишмоқда.

Мазкур қонун лойиҳасида бир қатор янгиликлар кўзда тутилган. Хусусан, лойиҳада йўл ҳаракатини ташкил этишга қўйиладиган умумий талаблар, йўл ҳаракатини ташкил этиш самарадорлигини таъминлаш тадбирлари, йўл ҳаракатини ташкил этишнинг асосий кўрсаткичларига ва техник воситаларига аниқлик киритилган.  

Шу билан бирга, йўлларда транспорт воситалари ҳаракатини чеклаш ёки тақиқлаш, тўхтаб туриш жойларига қўйиладиган талаблар, пулли тўхтаб туриш жойларидан фойдаланганлик учун тўлов ундирилмайдиган шахслар белгиланиб олинмоқда.  

Қонун лойиҳасини моддама-модда муҳокама қилиш давомида депутатлар Абдумалик Акромов ҳамда Дониёр Ғаниев лойиҳанинг 4-моддасида йўл эгаси сифатида корхона ва ташкилотлар, юридик шахслар билан бирга жисмоний шахслар ҳам кўрсатилаётганига эътироз билдирди. Уларнинг фикрича, жисмоний шахс йўлга эгалик қилиши мумкин эмас.  

Бунга жавобан Ички ишлар вазирлиги вакиллари ҳамда масъул қўмита депутатлари йўл эгаси тушунчаси қонунда биринчи марта қўлланилаётганини таъкидлаб, бу келгусида пуллик йўллар кўпайиши ҳам инобатга олинган ҳолда киритилганини билдирдилар. 

Шунингдек, айрим тоғли ёки чўл ҳудудларидаги йўлларни ҳамда кўприкларни таъмирлашда саховатли инсонлар ўзи ташаббус билан чиқиб, таъмирлаши ёки йўл қуриши мумкинлиги ҳам эътиборга олингани маълум қилинди. Албатта, жисмоний шахс ҳам йўл эгаси бўлиши мумкин ва жавобгарликни, масъулиятни ўз зиммасига олиши йўлларнинг яхшиланишига сабаб бўлади.  

М.Комилова,  

ЎзА