Ўзбекистон Республикаси Ўрмон хўжалиги давлат қўмитаси делегацияси жорий йил 10-21 май кунлари Кот-д’Ивуарнинг Абиджан шаҳрида бўлиб ўтаётган Бирлашган Миллатлар Ташкилотининг Чўлланиш ва қурғоқчиликка қарши курашиш конвенцияси 15-Томонлар конференциясида (СОР-15) иштирок этмоқда.

Конвенцияга аъзо давлатлар вакиллари, халқаро ташкилотлар, илмий доиралар ва фуқаролик жамияти тузилмалари мутахассислари қатнашаётган анжуманда Кот-д’Ивуар, Намибия, Нигерия, Либерия, Конго, Мавритания ва Нигер давлатлари Президентлари, Габон Республикаси Бош вазирини ҳам кўриш мумкин.

Қайд этиш жоиз, конференцияда Франция Президенти Эммануэль Макрон, Хитой ташқи ишлар вазири Ван И ва БМТнинг собиқ бош котиби Пан Ги Мун видеомурожаат йўллаган.

Маълумот ўрнида, 1994 йил Парижда қабул қилинган ушбу конвенцияга 196 мамлакат аъзо. Мамлакатимиз 1995 йил ратификация қилинган.

1997 йилдан буён ҳар икки йилда бир марта ташкил этиладиган юқори даражадаги анжуманга ҳозиргача Италия, Сенегал, Бразилия, Германия, Швейцария, Куба, Кения, Испания, Аргентина, Жанубий Корея, Намибия, Туркия, Хитой ва Ҳиндистон мезбонлик қилган.

Маълум бўлишича, конференция очилиш маросимида Ўзбекистон Президенти Шавкат Мирзиёев ташаббуси билан амалга оширилаётган “Яшил ҳудуд” умуммиллий лойиҳаси алоҳида эътироф этилди.

Тадбирда делегациямиз аъзолари мамлакатда чўлланиш ва қурғоқчиликка қарши курашиш борасида олиб борилаётган ишлар, жумладан, қатор лойиҳа ва ташаббуслар хусусида батафсил маълумот берган.

Шунингдек, 2023 йил МДҲда биринчи марта БМТнинг Чўлланиш ва қурғоқчиликка қарши курашиш конвенцияси бажарилиши бўйича қўмита йиғилишини Ўзбекистонда ўтиши бўйича COP 15 қарори қабул қилинди.

Мамлакатимизда бўлиб ўтадиган мазкур тадбир ўрмончилик, экология, атроф-муҳит чўлланиш, қурғоқчилик, чанг ва қум бўронлари бўйича МДҲ давлатлари миқёсидаги биринчи халқаро тадбир ҳисобланади.

Қолаверса, бўлажак анжуманда дунёнинг барча давлатларидан ташриф буюрадиган соҳага оид вакиллар ва халқаро донорлар бир ҳафта давомида чўлланиш, қурғоқчилик, чанг бўронлари, ердан барқарор фойдаланиш, ерни тиклаш масалаларини муҳокама қиладилар.

Яна бир маълумот: конференция давомида Ўзбекистон вакили Ўрмон хўжалиги давлат қўмитаси Халқаро алоқалар ва экотуризмни ривожлантириш бошқармаси бошлиғи Захадуллаев Абдувоҳид қўмита йиғилиши бюроси аъзоси ва раис ўринбосари этиб сайланди.

Эртага, конференция якунида Абиджан чақируви, Абиджан ҳамда Ер, ҳаёт ва мерос декларациялари қабул қилиниши кўзда тутилган.

ЎзА