Бугун Ахборот ва оммавий коммуникациялар агентлигида “Мамлакатимизда цемент ишлаб чиқариш: нарх ва сифат” мавзусида брифинг бўлиб ўтди.

Унда “Ўзсаноатқурилишматериаллари” уюшмаси ахборот хизмати раҳбари Жамшид Шерметов цемент ишлаб чиқариш соҳасида амалга оширилган ишлар, кўрсаткичлар  ва келгуси режалар хусусида маълумот берди.  

Қайд этилганидек,  юртимизда 25 миллион тонна йиллик қувватга эга 34 та цемент заводи фаолият кўрсатмоқда. Улар томонидан 2023 йилда цемент ишлаб чиқариш ҳажми 17,1 миллион тоннага етказилади.  Жорий йилнинг  ўтган икки ойида республика бўйича 1,12 миллион тонна цемент ишлаб чиқарилган.  

–Мамлакатимизда амалга оширилаётган қурилиш бунёдкорлик ишларига сифатли цемент етказиб бериш мақсадида “Ўзсаноатқурилишматериаллари” уюшмаси томонидан бир қатор йирик инвестиция лойиҳалари амалга оширилмоқда, – деди Ж.Шерметов.  – Жумладан, жорий йилнинг ўзида 7 та янги корхона ишга туширилиши сабабли қўшимча 5,8 миллион тонна қувват яратилади. 2023 йилда "Қорақалпоқцемент" МЧЖ томонидан умумий қиймати 65 миллион доллар бўлган йиллик қуввати 1 миллион 400 минг тонна цемент ишлаб чиқариш линияси ишга туширилади. Шунингдек, "Эко цемент" МЧЖ, “Ишончли посбон текстиль” МЧЖ, "Жомбойцемент" МЧЖ каби цемент лойиҳалари ўз фаолиятларини бошлайди.  2023 йилда цемент ишлаб чиқариш бўйича амалга ошириладиган инвестицион лойиҳаларнинг манзилли рўйхатига кўра, Қорақалпоғистон Республикаси, Андижон, Жиззах, Наманган ва Тошкент вилоятларида биттадан ҳамда Самарқандда иккита янги цемент заводлари барпо этиш режалаштирилган.  

Брифингда ишлаб чиқарилган цементнинг харид қилиш тартиби ва нархи ҳақида ҳам маълумот берилди. Жумладан, 2023 йил январь-февраль ойларида марказлаштирилган манбалар ҳисобидан молиялаштириладиган объeктлар қурилишига ўртача биржа котировка нархларида тўғридан-тўғри шартномалар бўйича 3,7 минг тонна цемент харид қилинган. Жорий йилнинг январь-февраль ойларида биржа савдоларида бир тонна портланд цемент ўртача 601 минг (ҚҚС билан) сўмдан сотилган.  

Шунингдек, брифингда Президентимизнинг 2022 йил 21 февралдаги “Уй-жойлар қурилишини ва қурилиш материаллари саноатини қўллаб-қувватлашнинг қўшимча чора-тадбирлари тўғрисида”ги қарорида белгиланган имтиёзларга ҳам тўхталиб ўтилди.  

Мазкур қарор билан 2022 йил 1 мартдан бошлаб барча юридик шахсларга цемент, цемент клинкери ва қурилиш ойнасини чекловларсиз тўғридан-тўғри шартномалар асосида (квотасиз) экспорт қилишга рухсат берилган. Шунингдек, 2024 йил 1 январга қадар Экспортни ривожлантириш агентлиги томонидан маҳаллий экспорт қилувчи корхоналарга қурилиш материалларини барча мамлакатларга, шу жумладан,  чегарадош давлатларга автомобиль, темир йўл ва ҳаво транспортида ташиш харажатларининг 50 фоизигача миқдорини компенсация қилишга субсидиялар тақдим этилган. Бу эса ушбу соҳа тадбиркорлари фаолиятини қўллаб-қувватлашда муҳим аҳамият касб этади.  

Насиба ЗИЁДУЛЛАЕВА,  

ЎзА