"2021 йил январь ойидан декабрь ойигача Туркияга келган сайёҳларнинг катта қисми россияликларга тўғри келмоқда, 4 миллион 694 минг 422 сайёҳ", – дейилади Туркия туризм вазирлиги тарқатган матбуот хабарномасида.

Хабарда келтирилишича, 2020 йил билан таққослаганда кўрсаткич 120 фоизга ошган. 

Энг кўп келган туристлар бўйича иккинчи ўринни Германия фуқаролари эгаллаган. Ўтган йили уч миллиондан зиёд германияликлар Туркияда ҳордиқ чиқарган. Учинчи ўрин Украинага тегишли бўлди. Икки миллиондан зиёд украиналиклар Туркияга келгани айтилмоқда. 

Туркия туризм вазирлигининг эълон қилган маълумотига кўра, 2021 йилда мамлакатга жами 30,3 миллион сайёҳ ташриф буюрган. Бу борадаги кўрсаткич  2020 йил билан солиштирганда 88 фоизга ошган. 

Туркия статистика бюросининг душанба куни эълон қилган ҳисоботида келтирилишича, Туркиянинг ўтган йили сайёҳликдан олган даромади 24,4 миллиард доллардан ошган.