2021 йилда дунё бўйича савдо-сотиқ ҳажми рекорд даражага чиқиб, жами 28,5 триллион долларни ташкил этди.

Бу 2020 йилга нисбатан 25 фоизга кўп, 2019 йилги кўрсаткич билан таққослаганда эса, ўсиш  13 фоизни қайд этган. Женевада бўлиб ўтган БМТнинг савдо ва ривожланиш (ЮНКТАД) бўйича Конференциясида тақдим қилинган маърузада шу ҳақда айтилади.

Маърузада жорий йилнинг биринчи чорагида савдо айланмаси ҳажмининг ўсиши секинлашиши маълум қилинди.

ЮНКТАД эълон қилган ҳисоботда келтирилишича, 2022 йилнинг биринчи чорагида савдо ҳажмининг ўсиш суръати секинлашиши мумкин, шу боис савдо-сотиқ ҳажми 2021 йилнинг тўртинчи  чорагида кузатилган даражага яқин бўлади.

Ўтган йилда халқаро савдонинг ўсишига мутахассисларнинг фикрича, "хомашё товарлари нархининг ошиши, пандемия билан боғлиқ чекловларнинг юмшагани ва иқтисодиётни рағбатлантириш йўлида амалга оширилган чора-тадбирлар туфайли истеъмол талабининг тез тиклангани" сабаб бўлган.