Бу ҳақда “Ўзбекчорванасл” агентлиги Бош директори Бахтиёр Атамуродов маълум қилди.

Вазирлар Маҳкамасининг 2020 йил 12 майдаги “Чорвачилик тармоғига давлат томонидан субсидия ажратишни тартибга солувчи норматив-ҳуқуқий ҳужжатларни тасдиқлаш тўғрисида”ги қарорига мувофиқ хорижий давлатлардан импорт қилинган наслдор қорамол, қўй ва эчкиларни сотиб олган хўжаликларга ҳамда республикада наслдор қорамолларни етиштирган наслчилик субъектларига субсидия бериш тартиби тасдиқланган эди.

Хусусан, ўтган 2021 йили республика бўйича 473 та тадбиркорлик субъектига 67,768 миллион сўм субсидия маблағлари ажратилди.

Жумладан, импорт қилинган 17 810 бош наслли қорамол учун 355 та чорвачилик субъектига 35,620 млн. сўм, 16 159 бош наслли қўй ва эчки учун 31 та чорвачилик субъектига 6,479 млн. сўм, 2 119 350 бош бир кунлик жўжа учун 36 та паррандачилик субъектига 19,069 млн. сўм давлат сармояси ажратилди.

Шунингдек, ички хўжаликларда етиштирилган 2 922 бош наслли қорамол учун 32 та чорвачилик субъектига 2 922 млн. сўм, интенсив усулда етиштирилган 3 679 тонна балиқ учун 19 та балиқчилик субъектига 3,679 млн. сўм маблағ ажратилиши таъминланди.

Вазирлар Маҳкамасининг 2021 йил 12-июлдаги “Чорвачилик, паррандачилик ва балиқчилик хўжаликларига улар томонидан етиштирилган ва сотилган маҳсулотлар учун субсидия ажратиш тартиби тўғрисидаги низомни тасдиқлаш ҳақида”ги қарорига мувофиқ 2021 йил давомида жами 657 та тадбиркорлик субъектига 60 млрд. сўм субсидия маблағи ажратилди.

Жумладан, сотилган сут учун 333 та чорвачилик субъектига 8,883 млн. сўм, сотилган йирик ва майда шохли моллар гўшти учун 104 та чорвачилик субъектига 3,836 млн. сўм, сотилган парранда гўшти учун 78 та паррандачилик субъектига 14,482 млн. сўм, сотилган парранда тухуми учун 124 та чорвачилик субъектига 27 808 млн. сўм, сотилган балиқ учун 18 та балиқчилик субъектига 4,991 млн. сўм маблағ ажратилиши таъминланди.

Икром Аввалбоев, ЎзА