Ўзбекистон Республикаси Президенти Администрацияси ҳузуридаги Ахборот ва оммавий коммукникациялар агентлигида ИИВ мутахасислари иштирокида матбуот анжумани ташкил қилинди.

Таъкидланишича, йўл қўйган камчиликлари учун 87 нафар ходимга нисбатан интизомий жазо чораси қўлланилган. Шундан 8 нафари ички ишлар тизимидан бўшатилган. 20 нафари эса эгаллаб турган лавозимидан озод этилган.

– Ўтган йили Ички ишлар органлари ходимлари ва фуқаролар ўртасидаги салбий ҳолатлар акс эттирилган 201 та видеоролик ижтимоий тармоқларда кенг муҳокамага сабаб бўлди, – дейди ИИВ кадрлар бошқармаси бошлиғи ўринбосари Авазбек Иномов. 

–Мазкур 201 та видеороликдан 84 та ҳолатда ходимларнинг айби тасдиқланмаган ва 22 та ҳолат бўйича фуқароларга нисбатан маъмурий жавобгарлик, 9 та ҳолатда жиноий иш қўзғатилган.                                                                                                                                                             

Тадбирда ИИВ ҳуқуқбузарликлар профилактикаси бош бошқармаси бўлим бошлиғи Баҳриддин Султонов томонидан турли ҳуқуқбузарликлар сабабли келиб чиққан низоли ҳолатлар бўйича ҳам маълумотлар тақдим қилинди.  

Ҳуқуқбузарликлар асосан ижтимоий қатламга мансуб аҳоли, яъни руҳий ҳолати бузилган, алкоголизм, гиёҳвандликка мубтало бўлган шахсларнинг оиладаги яшаш тарзи ёки оилавий муҳитда юзага келадиган низоли ҳолатлар билан боғлиқ.                                                                    

 Бундай низоли ҳолатларга нималар киради?  

Эр, хотин ёки оиланинг бошқа бир аъзоси ўртасида фуқаролик тартибидаги масалаларнинг, масалан мол-мулкка бўлган ҳуқуқларнинг доимий равишда ва ўз вақтида ҳал этилмаслиги натижасида келишмовчиликлар пайдо бўлади.                                                                                                                                                                                    

Шу боис, аҳолининг ижтимоий ҳолатини яхшилаш борасида мутасадди идоралар билан тегишли профилактик чора-тадбирлар амалга оширилмоқда. Хусусан, «Аёллар дафтари», «Ёшлар дафтари»нинг юритилиши назорат қилинмоқда.                                                                                                                                                              

Энг оғир ва низоли вазиятларнинг ҳуқуқбузарликка айланишига йўл қўймаслик учун буни маҳаллаларнинг ўзидаёқ бартараф этиш ишлари олиб борилмоқда. Ҳудудларда ҳуқуқбузарлик содир этилишига қараб маҳаллалар «қизил», «сариқ», «яшил» тоифаларга ажратилмоқда.                                                                                                                                                             

Ҳуқуқбузарликларни «маҳаллабай» тарзда «қизил», «сариқ», «яшил» тоифаларга ажратиш манзилли профилактикани қайси ҳудуддан бошлаш кераклигига ойдинлик киритади.                                                                                                                                                                    

Муҳайё Тошқораева, ЎзА