O‘zbekiston Respublikasi Prezidenti Administratsiyasi huzuridagi Axborot va ommaviy kommuknikatsiyalar agentligida IIV mutaxasislari ishtirokida matbuot anjumani tashkil qilindi.

Ta’kidlanishicha, yo‘l qo‘ygan kamchiliklari uchun 87 nafar xodimga nisbatan intizomiy jazo chorasi qo‘llanilgan. Shundan 8 nafari ichki ishlar tizimidan bo‘shatilgan. 20 nafari esa egallab turgan lavozimidan ozod etilgan.

– O‘tgan yili Ichki ishlar organlari xodimlari va fuqarolar o‘rtasidagi salbiy holatlar aks ettirilgan 201 ta videorolik ijtimoiy tarmoqlarda keng muhokamaga sabab bo‘ldi, – deydi IIV kadrlar boshqarmasi boshlig‘i o‘rinbosari Avazbek Inomov. 

–Mazkur 201 ta videorolikdan 84 ta holatda xodimlarning aybi tasdiqlanmagan va 22 ta holat bo‘yicha fuqarolarga nisbatan ma’muriy javobgarlik, 9 ta holatda jinoiy ish qo‘zg‘atilgan.                                                                                                                                                             

Tadbirda IIV huquqbuzarliklar profilaktikasi bosh boshqarmasi bo‘lim boshlig‘i Bahriddin Sultonov tomonidan turli huquqbuzarliklar sababli kelib chiqqan nizoli holatlar bo‘yicha ham ma’lumotlar taqdim qilindi.  

Huquqbuzarliklar asosan ijtimoiy qatlamga mansub aholi, ya’ni ruhiy holati buzilgan, alkogolizm, giyohvandlikka mubtalo bo‘lgan shaxslarning oiladagi yashash tarzi yoki oilaviy muhitda yuzaga keladigan nizoli holatlar bilan bog‘liq.                                                                    

 Bunday nizoli holatlarga nimalar kiradi?  

Er, xotin yoki oilaning boshqa bir a’zosi o‘rtasida fuqarolik tartibidagi masalalarning, masalan mol-mulkka bo‘lgan huquqlarning doimiy ravishda va o‘z vaqtida hal etilmasligi natijasida kelishmovchiliklar paydo bo‘ladi.                                                                                                                                                                                    

Shu bois, aholining ijtimoiy holatini yaxshilash borasida mutasaddi idoralar bilan tegishli profilaktik chora-tadbirlar amalga oshirilmoqda. Xususan, «Ayollar daftari», «Yoshlar daftari»ning yuritilishi nazorat qilinmoqda.                                                                                                                                                              

Eng og‘ir va nizoli vaziyatlarning huquqbuzarlikka aylanishiga yo‘l qo‘ymaslik uchun buni mahallalarning o‘zidayoq bartaraf etish ishlari olib borilmoqda. Hududlarda huquqbuzarlik sodir etilishiga qarab mahallalar «qizil», «sariq», «yashil» toifalarga ajratilmoqda.                                                                                                                                                             

Huquqbuzarliklarni «mahallabay» tarzda «qizil», «sariq», «yashil» toifalarga ajratish manzilli profilaktikani qaysi hududdan boshlash kerakligiga oydinlik kiritadi.                                                                                                                                                                    

Muhayyo Toshqorayeva, O‘zA