200 га яқин эҳтиёжманд оилага уй-жойлар топширилди
Наманганда Ўзбекистон Республикаси Президентининг Халқ қабулхоналарига йўлланган мурожаатлар асосида ногиронлиги бўлган, меҳнатга лаёқатсиз, уй-жойга муҳтож фуқароларга уй-жойлар топширилди.
Наманганда Ўзбекистон Республикаси Президентининг Халқ қабулхоналарига йўлланган мурожаатлар асосида ногиронлиги бўлган, меҳнатга лаёқатсиз, уй-жойга муҳтож фуқароларга уй-жойлар топширилди.
Шу муносабат вилоят ҳокимлиги, давлат ва жамоат ташкилотлари вакиллари иштирокида бўлиб ўтган тадбирда мамлакатимизда миллий ва азалий қадриятларимизга монанд юритилаётган кучли ижтимоий сиёсатнинг мазмун-моҳияти, бу борада давлат дастурлари асосида амалга оширилаётган кенг кўламли ишлар ҳақида сўз юритилди.
– Ўтган икки йил давомида вилоят бўйича уй-жойга муҳтож, жисмоний имконияти чекланган 343 нафар фуқаро арзон нархлардаги уй-жой таъминланди, – дейди вилоят хотин-қизлар қўмитаси раиси И. Қўчқорова. – Бугун яна 198 нафар эҳтиёжманд юртдошимизга бошланғич тўлови давлат бюджетидан тўлаб берилган имтиёзли кредит шартлари асосида уй-жойларнинг калити топширилмоқда. Уй-жойга муҳтож ҳамюртларимизнинг мурожаатлари эътиборсиз қолдирилмайди ва бу борадаги эзгу ишлар келгусида ҳам давом этади.
– Ўз уйим бўлишини кўп йиллардан бери орзу қилар эдим ва бу орзуларим қўл етмас юлдузлардек бўлиб келар эди, – дейди Наманган туманида яшовчи М.Исомиддинова. – Ниҳоят орзуим рўёбга чиқди, Қумқўрғон қишлоғида қурилган кўп қаватли уйлардан 2 хонали хонадон менга берилди ва мен бугун кўплаб ўзим каби инсонлар қатори жуда бахтиёрман. Шундай ғамхўрликлар учун Президентимиздан, хайрли ишларга дахлдор барча-барчадан бир умр миннатдормиз.