Бу қўшалоқ байрам тантаналарида иштирок этган вилоят ҳокими Зафар Рўзиев касбиликларни Мустақиллигимизнинг 28 йиллиги билан қутлар экан, мамлакатимизда тиббиёт соҳасини ривожлантиришга катта эътибор қаратилаётганини, мустақиллик арафасида фойдаланишга топширилган бу иншоот ана шу эътибор ва ғамхўрликларнинг амалий натижаси эканини таъкидлаб ўтди.

Шундан сўнг туманнинг кекса оқсоқоллари рамзий лентани кесиб, бинони расман очилганини билдиришди. Вилоят ҳокими бу ерда амалга оширилган ишлар билан танишди, касалхона палаталаридаги шарт-шароитлар, тиббий асбоб-ускуналар билан таъминланганлик даражаси билан қизиқди.

Вилоят ҳокими касалхонанинг тарихи билан боғлиқ альбомни кўздан кечирар экан, бу бино 1979 йилда қурилган бўлиб, унинг очилиш маросимида давлат ва жамоат арбоби Шароф Рашидов иштирок этганини кўриб, ана шу суратларни катталаштириб, касалхонанинг кўзга кўринадиган жойига илиб қўйишни тавсия этди.

Туман тиббиёт бирлашмаси биноси 170 ўринли бўлиб, реконструкция қилиш учун инвестиция дастурида белгиланган 5 миллиард 200 миллион сўмлик қурилш-монтаж ишлари амалга оширилди. Ҳозирги кунда касалхонада тиббий ёрдам, режали хирургия, кардиология, неврология, травматология, терапия, ички дорихона, физиотерапия каби бўлимлар ишлаб турибди.

Касалхонанинг реконструкция қилиниши туман аҳолисига тиббий хизмат кўрсатиш даражасини янада юксалтиришда муҳим аҳамият касб этади.