АОКАда ўтказилган брифингда Давлат кадастрлар палатаси ахборот хизмати раҳбари Муножат Йўлдошеванинг маълум қилишича, 2023 йилнинг 10 ойи давомида 19 минг 359 та географик объект номлари давлат реeстрига киритилган.

Шунингдек, ўтган давр мобайнида географик объектларга ном бериш ва уларни қайта номлаш тўғрисидаги таклифларни давлат экспертизасидан ўтказиш бўйича 46 минг 330 та ном эксперт комиссиясига тақдим этилган. Шундан, 22 минг 970 та географик объект номларига қонунчилик ҳужжатларига мувофиқлиги юзасидан ижобий экспорт хулосалари берилган. 23 минг 360 та ном қонунчилик ҳужжатлари талабларига номувофиқ деб топилиб, қайта кўриб чиқиш учун ҳудудий комиссияларга қайтарилган. Шу билан бир қаторда, ҳудудий комиссиялар томонидан ўрганилган ва ҳудудда мавжуд бўлмаган 954 та географик объект номларини давлат реестридан ўчириш, давлат реестрига киритилган 279 та географик объектларнинг номларига тегишлича ўзгартиришлар киритиш ишлари амалга оширилди.  

Маълумот ўрнида, 2023 йилнинг ўн ойида географик объектларга ном бериш ва уларнинг номларини ўзгартиришга доир республика бўйича маҳаллий кенгашларнинг 141 та қарорлари қабул қилинган.  

Аҳоли пунктларининг таркибий қисмлари бўлган барча маҳаллаларнинг (9 минг 457 та) номи давлат реестрига киритилди. Шунингдек, 163 та истироҳат боғи, 93 та хиёбон, 7 минг 711 та қабристон, 346 та зиёратгоҳ номи давлат реестрида жамланди. Жорий йил 1 январь ҳолатида республика бўйича 140 минг 432 та кўчадан (барча турдаги) 119 минг 970 тасининг номи давлат реестрида жамланган бўлса, 2023 йил 1 ноябрь ҳолатига 14 минг 54 тага кўпайиши натижасида 134 минг 24 тани яъни 95,4 фоизни ташкил этмоқда.  

Маълумот учун, "Географик объектларнинг номлари тўғрисида"ги қонунга кўра, географик объектларга ном бериш ва уларнинг номларини ўзгартириш тўғрисидаги таклифларни тайёрлаш жараёнида маҳаллий аҳолининг фикри, албатта, ҳисобга олинади.  

Давлат ва хўжалик бошқаруви органлари, тегишли маҳаллий ижро этувчи ҳокимият органлари географик объектларга ном бериш ва уларнинг номларини ўзгартириш тўғрисидаги таклифларни келиб тушганидан кейин муҳокама қилиш учун уларни беш иш кунидан кечиктирмай ўз расмий нашрларида, расмий веб-сайтларида, шунингдек, оммавий ахборот воситаларида эълон қилишлари белгиланган. Ушбу жараёнда маҳаллий аҳоли географик объектларга ном бериш ва уларнинг номини ўзгартириш тўғрисидаги фикрларини ўн беш кун муддатда беришлари мумкин бўлади.  

Маҳаллий аҳоли географик объектларга ном бериш ва уларнинг номларини ўзгартириш тўғрисидаги таклифларга нисбатан ўз фикрини оғзаки, ёзма ёхуд электрон шаклда, якка тартибда ёки жамоа бўлиб билдириши мумкин. Бунда шахснинг фамилияси, исми, отасининг исми, шунингдек, унинг яшаш жойи тўғрисидаги маълумотлар кўрсатилади.  

Ш.Маматуропова, ЎзА