Тошкент шаҳрида жиноятларни жиловлаш, жиноятчилик профилактикасини янада такомиллаштириш, одил судловни таъминлаш ва коррупциядан ҳоли ҳудудга айлантириш бўйича Йўл харитасининг ижросини таъминлаш юзасидан жиноят ишлари бўйича Юнусобод туман суди томонидан “Биллур” МФЙ биносида сайёр суд ташкил қилинди. Сайёр судда туман судьяси Ойбек Ҳайитов иш юритувидаги ЖКнинг 168-моддаси 4-қисми “а” банди билан Х.Р.га нисбатан бўлган жиноят ишини кўриб чиқди.

Судланувчи ўзганинг жуда кўп миқдордаги мулкини алдаш ва ишончни суиистеъмол қилиш йўли билан талон-торож қилиш мақсадида, 2019 йил 30 апрель куни соат 16:00 да Д.Т. га Юнусобод туманидаги кўп қаватли бинодан бир хонали уй сотиб олиб беришни ваъда қилади. Д.Т.дан жуда кўп миқдордаги – 17.500 АҚШ долларини фирибгарлик йўли билан қўлга киритиб, унга берган ваъдасини бажармасдан, пулларни шахсий эҳтиёжларига ишлатиб юборган.

Ўзбекистон Республикаси Марказий банкининг маълумотига кўра, 2019 йил 30 апрель куни 1 АҚШ долларининг сўмга нисбатан қиймати 8.445,4 сўмга тенглиги, шунга кўра, 17.500 АҚШ доллари 147.794.500 сўмни ташкил қилиши аниқланган.

Свйёр судда суд ҳукми билан судланувчига нисбатан ЖКнинг 57-моддасини қўллаб, иш ҳақининг 20 фоиз миқдорини давлат даромади ҳисобига ушлаб қолган ҳолда 3 йил муддатга ахлоқ тузатиш ишлари жазоси тайинланди.