Футбол бўйича Ўзбекистон чемпионати суперлигасининг жорий мавсуми ўйинлари финишига яқинлашган сари, кўпчилик баҳслар анчагина муросасиз тус олмоқда.

Бугун Тошкентнинг “Бунёдкор” ҳамда Олмалиқнинг ОКМК жамоалари ўртасидаги ўйин билан бир неча кундан буён давом этаётган 17-тур ўйинлари ниҳоясига етади.

Куни кеча Жиззахдаги марказий стадионда “Сўғдиёна” Тошкентнинг  “Пахтакор” жамоасини қабул қилди. Ушбу учрашув чемпионатимизнинг энг қизиқарли баҳсларидан бири бўлишини футбол мухлислари ҳам, мутахассислар ҳам кутишган эди.  

Мазкур турнинг марказий учрашуви мақомини олган бу икки азалий рақибларнинг баҳсида турнир жадвалида 2-поғонани эгаллаб, чемпионликка даъвогарлардан деб қаралаётган  “Сўғдиёна” ҳам, эрта-индин Осиё чемпионлар лигасида мамлакатимиз шарафини ҳимоя қилиши лозим  бўлиб турган Ўзбекистоннинг амалдаги чемпиони  “Пахтакор” ҳам жуда суст ўйин намойиш этиб, “йил ўйини” бўлишини кутган ишқибозларнинг ҳафсаласини пир қилди.

Менинг назаримда, жамоалар гол уруш учун эмас, гўё дарвозага ким кўпроқ ноаниқ тепиш учун баҳс бойлашгандек кўринди. Бу шахсий фикрим, албатта. Бири чемпионлик сари астойдил интилаётган, турнир жадвали якка пешқадами  Қаршининг “Насаф” жамоасини таъқиб қилаётган, айни пайтдаги таркибида чемпионатнинг энг яхши тупурари ва яхшигина легионерлари, бир қатор тажрибали ҳамда иқтидорли ёшларини жамлаган, мураббийи қаторасига “Ойнинг янг яхши мураббийи” бўлиб келаётган, суперлига жамоалари орасида ҳаммадан кўп гол ураётган “Сўғдиёна” бўлса, иккинчиси, ўзбек футболининг байроқдори, бугунги кунда Осиёнинг гранд жамоалари қаторида қаралаётган “Пахтакор” клубининг кечаги кўрсатган ўйинидан кўп йиллик тажрибага эга ўзбек футболи ишқибози ва оддий кузатувчи журналист сифатида ҳар иккала жамоа ўйинидан умуман қониқиш ҳосил қилмадим. Жамоалар ўйинида на шиддат бор, на шижоат...  

“Пахтакор” бу ўйини билан эртага мамлакат кубогини ва ҳатто чемпионат якунида бронза ёки кумуш медалларни қўлга киритар, аммо бунақа суст ўйини билан “Насаф”ни қувиб ўтолмаслиги аниқ ва, энг ачинарлиси, жорий йил янгича таснифда ўтказилиши белгиланган Осиё чемпионлар лигаси баҳсларида ўзбек футболи нуфузини тўкиб қўймасайди, деб чўчиб турибман.  

Чемпионатимиз тугашига 9 тур қолди. Демак, ҳар икки жамоа бош мураббийлари – Иван Бошковичда ҳам, Максим Шатскийда ҳам ҳали шогирдлари ўйинларини тўғри йўлга солиб олиши, улардаги бор иқтидорни ва уларнинг ҳар бири нималарга қодирлигини юзага чиқариб, намойиш этиб, жозибадор ва мухлису мутахассисларга ёқадиган, шиддатли ва голларга бой ўйин кўрсатишини намойиш этишлари учун етарлича вақт бор.

Ушбу ўйинда 67-дақиқада “Пахтакор”чи Дониёр Абдуманноповнинг мезбонлар жарима майдончасига пастдан узатган тўпини иккинчи даврада катта умидлар билан жиззахликлар таркибига қўшиб олинган, ёш иқтидорли футболчиларидан бири Суҳроб Иззатов ҳужумчиларга хос бир шўнғиш ҳаракати билан жамоадоши, яна бир ёш иқтидор эгаси Муҳаммадюсуф Собиров қўриқлаётган дарвоза тўрига, яъни ўз жамоаси дарвозасига  жойлаб қўйди ва “марказий учрашув” мақомини оқламаган ўйин тақдири автогол эвазига меҳмонлар фойдасига ҳал бўлди. “Сўғдиёна” – “Пахтакор” –0:1.

17-турнинг қолган учрашувларида қуйидаги натижалар қайд этилди: “Металлург” (Бекобод) – “Динамо” (Самарқанд) – 0:1, “Нефтчи” (Фарғона) – “Олимпик” (Тошкент) – 3:0, “Локомотив” (Тошкент) – “Қизилқум” (Навоий) – 4:2, “Насаф” (Қарши) – “Андижон” (Андижон) – 3:0, “Сурхон” (Термиз) – “Навбаҳор” (Наманган) – 0:1.

А.Қаюмов,

ЎзА