Самарқанд вилоят божхона бошқармаси йилнинг беш ойида шундай натижага эришгани бошқарма масъуллари иштирокида ўтказилгани матбуот анжуманида қайд этилди.

Вилоят божхона бошқармаси бошлиғининг биринчи ўринбосари Анвар Муҳаммадиевнинг маълум қилишича, беш ойда давлат бюджетига 1 триллион 486 миллиард сўмга тушум туширилишига эришилган. Тадбиркорлик субъектларини қўллаб-қувватлаш мақсадида божхона тўловларидан 1 триллион 630 миллиард сўмга яқин имтиёз ва тариф преференсиялари қўлланилган. Экспорт ҳажми 458,4 миллион АҚШ долларни ташкил этиб, 2024 йилнинг шу даврига нисбатан 51 фоизга ошган.

– Ўтган даврда аниқланган 980 та ҳуқуқбузарлик ҳолатида 17 миллиард сўмлик товар ва транспорт воситаларининг ноқонуний айланмасига чек қўйилди, – деди А.Муҳаммадиев. – Бундан ташқари, гиёҳвандлик воситалари билан боғлиқ 18 ҳолатда жами 9970,4 грамм гиёҳвандлик моддалари қонунга зид равишда олиб ўтилаётгани аниқланди. 11 та ҳолатда 223,3 миллион сўмликдан зиёд 2889 литр алкогол маҳсулотлари ҳамда 169 ҳолатда 1,2 миллиард сўмликдан ортиқ 19836 қути тамаки маҳсулотларининг ноқонуний айланмаси олди олинди. Шунингдек, заргарлик буюмларининг ноқонуний айланишига қарши курашиш борасидаги ишлар натижасида 47 ҳолатда 2,8 миллиард сўмлик 2906 грамм заргарлик буюмлари ашёвий далил сифатида ушлаб қолинди.

Матбуо анжуманида божхона тартиб-қоидаларидаги ўзгаришлар ҳақида ҳам маълумот берилиб, журналистларни қизиқтирган саволларга жавоб қайтарилди.

Ғ.Ҳасанов, ЎзА мухбири