Энергетика вазирлигининг маълум қилишича, 17 декабрда “Ҳудудгазтаъминот” акциядорлик жамиятидан табиий газ олувчи 1 минг 204 та метан заправканинг 689 таси белгиланган график асосида ишлаган.

“Ўзбекнефтгаз” акциядорлик жамияти томонидан мамлакатимиздаги барча автомобилларга ёнилғи қуйиш шохобчаларига жами 1160 тонна автобензин етказиб берилган. Ишлаётган метан заправкаларга 5,7 млн. кубометр табиий газ ҳамда 400 тонна суюлтирилган газ етказилган.  

Шунингдек, Энергетика вазирлиги тизимидаги корхоналар 254,6 млн. кВт•соат электр энергияси ишлаб чиқарди. Бу режага нисбатан 103 фоиз кўп демакдир. Истеъмолчиларга 242,5 млн. кВт•соат электр манбаси етказилиб берилди. Бу эса мўлжалга кўра 104 фоиз зиёдни ташкил этди.  

Бунинг учун иссиқлик электр станцияларида 45 млн. кубометр табиий газ, 16,9 минг тонна кўмир ҳамда 10 минг тонна мазут ёқилди. Республика табиий газ истеъмоли 156,7 млн. кубометрни ташкил қилган.  

– Барча корхоналарда тузилган штаблар 24 соатлик навбатчилик асосида ишламоқда. Газ босимининг бир меъёрда ростлангани боис 17 декабрь куни сутканинг тиғиз вақтларида электр энергияси етказиб беришга қўйилган вақтинчалик қисқа муддатли чекловлар қўлланилмади. Кеча мамлакатимиз бўйлаб электр қурилмаларда юзага келган 13 та, газ таъминотида юзага келган 2 та носозлик бартараф қилинди. Таъминотдаги узилишлар юзасидан Энергетика вазирлиги тизим ташкилотларига истеъмолчилардан келиб тушган 161 та мурожаат махсус бригадалар томонидан бартараф этилди. Табиий ва суюлтирилган газ таъминоти бўйича 160 та мурожаат келиб тушди. Мавжуд камчиликларни бартараф этиш бўйича тезкор чора-тадбирлар олиб борилди, – деди бугун ўтказилган брифингда Энергетика вазирлиги матбуот хизмати раҳбари Ҳасан Тошхўжаев.  

Н.Зиёдуллаева, ЎзА