Миллий гвардия хабарлари

Президентимизнинг 2024 йил 5 февралда ўтказган ижтимоий соҳадаги устувор вазифаларга бағишланган йиғилишида ўқувчиларнинг хавфсиз ва сифатли таълим-тарбия олиши борасида вазирлик ва идораларнинг олдига бир қатор кечиктириб бўлмайдиган вазифалар белгилаб берилиб, Ички ишлар вазирлиги тизимидан икки минг нафар инспектор-психолог штати Миллий гвардияга ўтказилди.  

Куни кеча Миллий гвардия Наманган вилояти бўйича бошқармасида янги қабул қилинган 164 нафар инспектор-психолог лавозимига қабул қилинган ҳарбий хизматчиларнинг Миллий гвардия сафларига қабул қилинганлиги бўйича “Миллий гвардия қасамёди”ни қабул қилишга бағишланган тантанали тадбир ўтказилди.  

Тадбирда Миллий гвардия қўмондони ўринбосари, полковник Сарвар Мамаюсупов, вилоят ҳокимлиги, Мактабгача ва мактаб таълим бошқармаси ҳамда бошқа жамоат ва ташкилотлари вакиллари, ҳарбий хизматчи ва ходимлар, ўқувчи- ёшлар иштирок этди.    

Шунингдек, Миллий гвардия Наманган вилояти бўйича бошқармасининг 9 нафар инспектор-психологи, яъни 5 нафар катта лейтенант, 3 та капитан, 1 майорга ҳарбий унвонлар топширилди.  

Ўқувчиларнинг давомати ўрганилди

Ўзбекистон Республикаси Миллий гвардияси қўмондони ўринбосари, полковник С. Мамаюсупов раҳбарлигидаги ишчи гуруҳ томонидан Наманган вилоятидаги 710 та умумтаълим мактабидаги давомат, “Маҳалла еттилиги” билан ҳамкорликда “Мактаб–маҳалла–оила” тамойилига асосан ташкил этилган ишлар ўрганилди.  

Хусусан, Миллий гвардия қўмондони ўринбосари томонидан Поп туманидаги 67, 69- сонли мактабларда давомат ўрганилганда ўқувчиларнинг дарсга қатнови 97,9 фоиз эканлиги аниқланди.  

Мактаб қоровулларининг металодетектордан фойдаланиш кўникмаси, “Ватанпарварлик бурчаги”ни ташкил этиш, ушбу мактабни битириб кетган, шартнома асосида ҳарбий хизматни ўтаётган йигитларнинг расмларини қўйиш, инспектор-психологлар томонидан “бозор боласи” тадбирларини ўтказиш, қўл жанги ва бошқа яккакураш турлари бўйича спорт секцияларини кўпайтириш тўғрисида масъулларга кўрсатмалар берилди.

Н.Раҳмонова, ЎзА мухбири