Бельгияда истиқомат қилувчи иқтидорли ўсмир Лоран Симонс атиги 15 ёшида иккинчи докторлик даражасини қўлга киритди. Бу ҳақда Bild нашри хабар берди. У илк бор докторлик диссертациясини 12 ёшида муваффақиятли ҳимоя қилган эди.

Маълум қилинишича, Лоран саккиз ёшида мактаб аттестатини олган, 11 ёшида эса магистратура босқичини тамомлаган. Ҳозирда у Германиянинг Мюнхен шаҳридаги  Gelmgolts марказида учинчи илмий даражаси устида ишламоқда. Тадқиқотлари тиббиёт ва сунъий интеллект уйғунлигига бағишланган.  

Унинг сўнгги диссертацияси назарий квант физикасига оид бўлса, аввалги илмий иши экспериментал физика йўналишида бўлган. Лораннинг таъкидлашича, фотографик хотира ва мураккаб жараёнлар ўртасидаги боғлиқликни тез аниқлаш қобилияти унга илмий фаолиятида катта ёрдам беради.  

Ота-онасининг айтишича, Лораннинг ноёб иқтидори жуда эрта намоён бўлган. У тўрт ёшида мактабга борган, олти ёшида гимназияга қабул қилинган, тўққиз ёшида эса университет талабаси бўлган. 12 ёшида у Макс Планк институти тарихидаги энг ёш докторантлардан бири сифатида танилган.  

Бугунга келиб, Лоран Симонс Рим папаси билан учрашган, Нобель мукофоти совриндорлари билан мулоқот қилган ҳамда дунёнинг етакчи илмий марказларида маърузалар ўқиган.  

<iframe width="560" height="315" src="https://www.youtube.com/embed/QI6Vc3EOs8U?si=TMQaMOpcxuNvO6RY" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Улуғбек Тўхтаев, ЎзА