Италиянинг Монтесильвано шаҳрида шахмат бўйича 18 ёшгача бўлган ёшлар ўртасида ўтказилаётган жаҳон чемпионатида мамлакатимиз вакиллари муносиб натижаларга эришмоқда.

Айниқса, 14 ёшли қизлар ўртасидаги баҳсларда юртимиз шарафини ҳимоя қилаётган Афрўза Ҳамдамова ортда қолган 7-тур ўйинларидан кейин 6 очко жамғарган ҳолда 125 нафар иштирокчи орасида ғолибликка даъвогарлик қилаётгани эътиборлидир.  

Бугун, 21 ноябрь куни жаҳон чемпионатининг 8-тур баҳсида Афрўза Ҳамдамова ўзи билан бир хил 6 очкога эга қозоғистонлик Эльназ Калиахмет билан куч синашади. Ушбу ёш тоифасида 6,5 очко билан етакчилик қилаётган грузиялик Анастасия Киртадзе 6 очкога эга АҚШ вакили билан куч синашади. Айнан ушбу жуфтликлар ўртасидаги беллашувлар мазкур ёш тоифасида жаҳоннинг энг кучли шахматчи қизлари кимлигига ойдинлик киритиши билан аҳамиятлидир.  

80 та мамлакатдан 760 нафардан зиёд ёш шахматчилар иштирок этаётган мусобақанинг 16 ёшли қизлар мусобақасида қатнашаётган яна бир юртдошимиз Гулдона Каримова 7-тур ўйинларидан кейин 5 очко жамғариб, 138 нафар иштирокчи орасида 15-ўринни эгаллаб турибди.  

Чемпионатда 14 ёшли ўғил болалар беллашувида қатнашаётган ҳамюртимиз Миразиз Қўзиев 4 очко жамғарган ҳолда 178 нафар қатнашчи орасида 67-поғонада бормоқда.  

Жаҳон чемпионати 25 ноябрга қадар давом этади.  

Т. Рўзиев, ЎзА