“Ўзйўлинспекция” томонидан жорий йилнинг январь-июль ойлари давомида йўл қурилиши объектлари, сунъий иншоотлар ҳамда йўл-қурилиш материаллари ишлаб чиқаришда норматив ҳужжатлар талабларига риоя этилиши ўрганилиб, 3 минг 155 та объектда назорат ўтказилди.

Ўрганишлар натижасида 5 минг 846 та қоида бузилиш ҳолатлари аниқланиб, уларни бартараф этиш учун буюртмачи, пудратчи, лойиҳачи ва сақловчи ташкилотларга – 3590 та бажарилиши мажбурий бўлган кўрсатма берилди. 3026 та кўрсатмадаги қоида бузилишлар бартараф этилди. Қолган 564 та кўрсатманинг ижроси ҳам қатъий назоратга олинган.

–Инспекция томонидан етти ой ичида 139 та ҳолат бўйича умумий суммаси қарийб 6 миллиард 132 млн. сўмлик сифатсиз бажарилган қурилиш-монтаж ишлари ҳажмини тўловдан чиқариш бўйича буюртмачиларга талабномалар киритилди, – дейди “Ўзйўлинспекция” ахборот хизмати раҳбари Комилжон Шамсиддинов. – Шундан 4 млрд. 203 млн. сўмлик 92 та талабнома ижроси таъминланди.

Содда қилиб айтганда, шунча миқдорга баҳоланган, лекин амалда сифатсиз бажарилган қурилиш ва таъмир ишлари пудратчилар томонидан ўз маблағлари ҳисобидан меъёрий ҳужжатлар талаблари асосида қайтадан бажарилди. Сифатсиз бажарилган ушбу қурилиш-монтаж ишлари ҳажмини тўловдан чиқариш бўйича буюртмачиларга талабномалар киритилди.

Инспекциянинг маълум қилишича, йўл қурилиш обектларида қўпол қоидабузилишларга йўл қўйган ва давлат инспекторлари томонидан берилган кўрсатмаларни муддатида бартараф этмаган мансабдор шахсларга нисбатан «Маъмурий жавобгарлик тўғрисида»ги Кодекснинг 99- ва 147-моддаларига кўра, 134 та маъмурий баённома расмийлаштирилиб, суд органларига юборилди. 120 та баённома бўйича 175 млн. 410 минг сўмлик жарима қўлланди.

Ш.Маматуропова, ЎзА