Мамлакатимизда кўп энергия сарфлаётган йирик корхоналарда мажбурий энергия аудит ўтказиш механизми жорий этилган.

Ушбу механизмдан кўзланган мақсад электр энергиясини тежаш йўлида электр таъминотини ўрганиш, электр таъминоти схемасини ва истеъмол режимини таҳлил қилиш ҳамда тижорий ва техник ўлчовларни такомиллаштириш бўйича таклифлар ишлаб чиқишга қаратилади. Бунда, аввало, аҳоли ва корхоналардаги кичик ГЭС, шамол ва қуёш электр станциялари ўз эҳтиёжидан ортиқча миқдорда ишлаб чиқарган электр энергиясини “Ҳудудий электр тармоқлари” корхоналари томонидан кафолатланган тартибда белгиланган нархда сотиб олиш механизми йўлга қўйилади.

Иккинчидан, ёқилғи-энергетика йиллик истеъмоли 2 минг тонна шартли ёқилғи ҳажмига тенг бўлган ёки 1 минг тоннадан ортиқ мотор ёқилғиси бўлган корхоналар 2021-2022 йилларда мажбурий энергетик текширувдан ўтказилади.

Айтиш жоизки, бу тадбирлар сабаб 2 йилда энергия самарадорлигини ошириш натижасида 3,3 миллиард кВт/соат электр энергияси, 2,6 миллиард метр куб табиий газ ва 16,3 минг тонна нефтни тежаш кўзда тутилмоқда.

Электр энергетикада назорат инспекциясида ўтказилган тадбирда шу ҳақда сўз борди.

Ўзбекистон Республикаси Энергетика, Иқтисодий тараққиёт ва камбағалликни қисқартириш вазирликлари, “Ўзнефтгазинспекция” вакиллари, энергия аудиторлари иштирок этган учрашувда ёқилғи-энергетика истеъмолчиларида мажбурий энергетика текширувларининг ўтказилиши натижалари таҳлил этилди.

Таъкидланганидек, Ўзбекистон Республикасининг “Энергиядан оқилона фойдаланиш тўғрисида”ги қонунида бу ўз ифодасини топган. Қонуннинг 13-моддасига асосан ҳар йили умумий ҳажми икки минг тоннадан ортиқ шартли ёқилғи ёки бир минг тоннадан ортиқ мотор ёқилғисига тенг энергия ресурсларини сарфлайдиган корхона, муассаса ва ташкилотлар мажбурий энергетика текширувларидан ўтказилади.

– Ушбу қонун талабларидан келиб чиқиб, Президентимизнинг 2019 йил 10 июлдаги қарори билан “Ёқилғи-энергетика ресурслари жами йиллик истеъмоли икки минг тоннадан ортиқ шартли ёқилғи ёки бир минг тоннадан ортиқ мотор ёқилғиси бўлган корхоналарни мажбурий энергетик текширувдан (энергия аудитидан) ўтказишнинг 2021-2022 йиллар даврига мўлжалланган жадвали” тасдиқланган, – деди Электр энергетикада назорат инспекцияси бошқарма бошлиғи Алишер Тўраев. – Унга мувофиқ, ўтган йилда 65 корхона ва ташкилотда мажбурий энергетика текширувлари ўтказилиши белгиланган. Амалда 20 корхонада мажбурий энергетика текширувларини ўтказиш дастурлари “Ўзэнергоинспекция” ва “Ўзнефтгазинспекция” томонидан тасдиқланган бўлиб, шулардан 2020 йил якунига қадар 7 корхонада текширув ўтказилди. Яна уларнинг 3 тасида ушбу жараён давом эттирилмоқда.

Ўтказилган энергетика текширувларга кўра, 2,9 миллион киловатт соат электр энергияси ҳамда 12,6 минг Гкал иссиқлик энергияси тежалиши бўйича тавсиялар натижасида 9,1 минг киловатт соат электр энергияси ва 215,2 Гкал иссиқлик энергияси тежалишига эришилган. Бироқ жадвалга киритилган 45 корхонада энергетика текширувлари ўтказилиши юзасидан чоралар кўрилмаган.

Шундан келиб чиқиб, тадбирда энергия аудиторлари жадвал бўйича 2021 йилда 118 корхонада мажбурий энергетика текширувлари ўтказилишини маълум қилди.

Насиба ЗИЁДУЛЛАЕВА, ЎзА