Қатарнинг Доҳа шаҳрида бўлиб ўтган “10th Qatar Weightlifting Cup” халқаро турнирида 24 та медаллар шодаси билан умум жамоада 2-ўринни эгаллаган Ўзбекистон оғир атлетика терма жамоаси пойтахт аэропортида тантанали кутиб олинди.

Дунёнинг 30 та мамлакатидан маҳоратли оғир атлетлар иштирок этган нуфузли мусобақада Ўзбекистон терма жамоаси вакиллари 4 та олтин, 15 та кумуш ва 5 та бронза жами 24 та медал қўлга киритиб, очколар жамғариш бўйича умумжамоа ҳисобида иккинчи ўринни эгаллади.

Йилнинг сўнгги нуфузли халқаро турниридаги ушбу натижа ўзбек оғир атлетика мактабининг барқарор ривожланаётгани ва спортчиларимизнинг юқори тайёргарлик даражасини яна бир бор намоён этди.

Кутиб олиш маросимида иштирок этган Ўзбекистон оғир атлетика федерацияси мутасаддилари, спортчиларнинг оила аъзолари ва кенг жамоатчилик вакиллари Қатарда эришилган муваффақият кейинги йиллардаги натижаларнинг янада салмоқли бўлишига ижобий таъсир кўрсатишини таъкидлашди.

Т. Рўзиев, ЎзА