Навоий вилояти ҳокими Қобул Турсунов юксак мукофотни Президентимиз номидан топширар экан, Малика момо дориломон кунларга етказганига шукр айтиб, юртбошимизнинг эътибор ва ғамхўрлигидан суюнди.

Момо ҳаётнинг оғир машаққатларини кучли иродаси билан енгди. Иккинчи жаҳон уруши даврида фронт ортида меҳнат қилди. 9 нафар фарзандини тарбиялаб, вояга етказди. Бугун фарзандлари, 35 нафар невараси, 65 нафар чевараси ҳамда 6 нафар эвараси қуршовида эъзоз, эътиборда яшамоқда.

Гарчанд 106 ёшни қаршилаган бўлсада, момо ҳали тетик. Маҳалладошлар билан бир ерда жам бўлса, фаровон кунларнинг шукронасидан, тинч кунларнинг қадридан сўзлайди.

– Фаровон кунлар, тўкинчиликда яшашни орзу қилиб, ниҳоят шу дамларни кўрдик, – дейди Малика момо. – Иккинчи жаҳон уруши даҳшатларини илоҳим ҳеч ким кўрмасин. Бугун болаларим, невара, чевараларимни кўриб, тўкин, бахтли ҳаётдан қувонаман. Юртбошимизнинг мени юксак мукофот билан тақдирлаганини эшитиб, хурсанд бўлдим. Биз, кексаларга қаратаётган улкан эътибори ва ғамхўрлигидан миннатдорман. Юртимиз доимо тинч, ҳаётимиз тўкин-сочин, Юртбошимиз соғ-омон бўлсин!