Ўзбекистон Экологик партияси Марказий кенгаши раиси, партия фракцияси раҳбари Абдушукур Ҳамзаев бошчилигидаги Олий Мажлис Қонунчилик палатаси ҳамда маҳаллий Кенгаш депутатларидан иборат ишчи гуруҳ Тошкент шаҳрининг Сергели ва Чилонзор туманларида жойлашган бир қатор ишлаб чиқариш корхоналари ва инфратузилма иншоотлари фаолияти билан танишди.

Ўрганиш доирасида “Profpack” корхонаси, Чилонзор туманида ишга туширилган янги когенерация иншооти ҳамда алюмин эшик ва деразалар ишлаб чиқаришга ихтисослашган “ALUTEX” масъулияти чекланган жамияти фаолияти билан яқиндан танишилди. 

Ўрганиш жараёнида мазкур корхоналарда экологик талабларга қай даражада риоя этилаётгани ҳамда атрофидаги яшил ҳудудларни янада кенгайтириш борасида амалга оширилган ишларга алоҳида эътибор қаратилди. Шунингдек, корхоналар томонидан ички ва ташқи бозор учун сифатли маҳсулотлар тайёрланаётгани, янги иш ўринларининг яратилаётгани ҳам ишчи гуруҳ аъзоларининг диққат-марказида бўлди. 

Чиқиндиларни қайта ишловчи “Profpack” корхонаси томонидан бир суткада 120 тоннагача чиқинди қайта ишланиб, талабга қараб турли кўринишдаги қоғоз қутилар тайёрланар экан. Корхонада 400 та иш ўрни мавжуд бўлиб, ҳозирда 300 нафар ходим иш билан таъминланган. Партия раҳбари чиқиндиларни қайта ишлаш бугунги кун учун жуда муҳим эканини қайд этиб, 1 тонна қоғозни қайта ишлаш орқали 17 туп дарахтни кесилишдан асраш мумкинлигини таъкидлади. Бир кунда ўртача 100 тонна қоғоз чиқиндисини қайта ишлаш орқали эса 1 минг 700 туп дарахтни сақлаб қолиш мумкин.

Ишчи гуруҳнинг навбатдаги манзили Чилонзор туманида ишга туширилган иссиқлик ва электр таъминотини яхшилаш, шу билан бирга экологик хавфсизликни таъминлашда ҳам муҳим аҳамиятга эга бўлган янги когенерация иншооти бўлди. Ўрганишларда маълум қилинганидек, ушбу иншоотнинг қуввати соатига 4,6 мегаватт электр энергияси ва 29 гигакалориядан ортиқ иссиқлик ишлаб чиқаришга етади. Иншоот йилига 5,3 миллион куб метр табиий газни тежаш имконини бериб, атмосферага чиқадиган ифлослантирувчи моддаларни 67 фоизгача камайтиради ҳамда оқова сув чиқиндилари умуман бўлмаслиги кўзда тутилган.

Алюмин эшик ва деразалар ишлаб чиқаришга ихтисослашган “ALUTEX” масъулияти чекланган жамияти фаолияти билан танишиш жараёнида ишчи гуруҳ эътиборини тортган жиҳат жамиятнинг биринчи корхонасида ўрнатилган 520 та фильтрдан иборат замонавий технология бўлди. Мазкур технология алюминийни қайта ишлашда ажралиб чиқадиган, инсон саломатлиги учун хавфли бўлган зарарли моддаларни 99 фоизгача тозалаш имконини беради. Корхона экологик нормаларга тўла амал қилган ҳолда фаолият олиб бормоқда. Жамиятнинг иккинчи катта корхонасида ҳам 1 минг 100 та фильтрдан иборат замонавий тозалаш тизими ҳамда сувни қайта ишлаш технологияси ўрнатилган.

Мулоқот давомида партия раҳбари ҳар бир корхона ана шундай замонавий фильтрларни жорий этиши шартлигини алоҳида таъкидлади. Бу экологик талабларга риоя қилишда муҳим аҳамият касб этади. 

Ўрганишлар давомида аниқланган камчиликлар депутатлар назоратига олинди. 

Муҳтарама Комилова, ЎзА