Комбинат ахборот хизматидан маълум қилишларича, металлурглар бу борада ўтган йилги натижани янгилашган. Яъни, 2019 йилда 100 минг тонналик марра 17 сентябрь куни забт этилган эди.

Маълумки, Президентимизнинг 2020 йил 15 майдаги «Тошкент вилоятида саноат ишлаб чиқариш ҳажмларини яна кенгайтириш чора-тадбирлари тўғрисида»ги қарорига мувофиқ, Тошкент вилояти ҳудудидан 3-Мис бойитиш фабрикаси чиқиндиларини тўплаш омбори ва инфратармоқ объектларини қуриш учун қарийб 3 минг 770 гектар ер майдони ажратилди.

Давлатимиз раҳбарининг 2020 йилнинг 26 май куни комбинатнинг истиқболини белгиловчи яна бир муҳим ҳужжат - «Олмалиқ КМК» АЖ конлари негизида рангли ва қимматбаҳо металлар ишлаб чиқаришни кенгайтиришга доир қўшимча чора-тадбирлар тўғрисида”ги қарори қабул қилинди.

«Олмалиқ КМК» АЖ кон майдонлари негизида рангли ва нодир металларни ишлаб чиқаришни кенгайтириш икки босқичда амалга оширилиши кўзда тутилган. Биринчи босқич – 2017-2025 йилларда аффинажланган олтин ишлаб чиқариш йилига 14,94 тоннадан 38 тоннагача, катодли мис ишлаб чиқариш 108 минг тоннадан 290 минг тоннагача, кумуш ишлаб чиқариш 95,96 тоннадан 203 тоннагача оширилади.

Ушбу кўрсаткичларга эришиш учун «Ёшлик I» конини ўзлаштириш ҳисобига бирлашган Ёшлик-Қалмоққир конларидан 100 тоннагача руда қазиб олиш, 3-Мис бойитиш фабрикаси ҳамда ички ва ташқи инфраструктура тармоқларини қуриш, 2-Ванюков печини бунёд этиш, янги конвертер участкаси, №1- ва №2- анод печлари, мисни электролиз қилиш цехи, №5-Сульфат кислотаси цехи, янги БРВ-6 кислород блокини қуриш, олтин ва кумушни аффинаж қилиш цехининг аффинажлаш қувватларини ошириш режалаштирилган. Лойиҳани амалга оширишнинг аниқ молиявий манбалари белгиланган.

Иккинчи босқич – 2022-2028 йилларда аффинажланган олтин ишлаб чиқаришни йилига 38 тоннадан 50 тоннагача, катодли мисни 290 минг тоннадан 400 минг тоннагача, кумуш ишлаб чиқаришни 203 тоннадан 270 тоннагача оширишга қаратилган тадбирлар амалга оширилади.

Иккинчи босқичда бирлашган Ёшлик-Қалмоққир конларининг қазиб олиш йиллик қувватларини 150 миллион тоннагача ошириш, 4-Мис бойитиш фабрикаси, 3- Ванюков печини қуриш, Мисни электролиз қилиш цехини кенгайтириш (2-босқичи), 4-Сульфат кислотаси цехини кенгайтириш, янги БРВ-7 кислород блокини қуриш вазифаси белгиланган.