2021 жылдың 1 қыркүйегінен бастап Өзбекстанда жүргізушілерден сенімхат сұрау рәсімі жойылады.

Бұл туралы «Жол қозғалысы қауіпсіздігі саласындағы мемлекеттік қызметтерді көрсету рәсімдерін жеңілдету шаралары туралы» Үкіметтің қаулысында көрсетілген.

Электронды форматқа ауысуы арқылы келесі құжаттарды жүргізушілерден талап ету тәртібі жойылады:

• автокөлікті басқаруға сенімхат (нотариалды куәландырылған);
• техникалық байқау туралы ақпарат;
• автокөлік құралының терезелерінің түсін өзгертуге (қарайтуға) рұқсатнама.

Қаулыға сәйкес, 2021 жылдың 1 тамызынан бастап Бірыңғай интерактивті мемлекеттік қызметтер порталы арқылы келесі мемлекеттік қызметтер көрсетіледі:

• автокөлік және қалалық электр көлігі жүргізушілерін даярлау, қайта даярлау және біліктілігін арттыру бойынша мемлекеттік емес білім беру қызметтерін көрсететін заңды тұлғалардың оқу топтарын тіркеу;
• Автокөлік және қалалық электр көлігінің жүргізушілері кандидаттарына емтихан тапсыру үшін құжаттарды және ұлттық жүргізуші куәлігін ресімдеу.